16 mart futbol tarixində özünəməxsus yer tutur. Sport24.az xəbər verir ki, müxtəlif illərin bu günündə Afrika Millətlər Kubokunun iki qalibi müəyyənləşib.
1978-ci ildə keçirilən Afrika Millətlər Kubokunun qalibi martın 16-da müəyyənləşib. 11-ci dəfə keçirilən bu yarış Qanada təşkil edilib. 8 komandanın iştirakı ilə keçirilən turnirdə ev sahibi Qana yığması çempionluq yaşayıb. Bu Qananın Afrika Millətlər Kuboku tarixində 2-ci qızıl medalı olub. Final görüşündə Qana Uqanda millisini 2 cavabsız qolla məğlub edərək bu uğuru əldə edib. Üçüncü yerin sahibi isə Nigeriya yığması olub.
Həmçinin 1990-cı ilin 16 martında da Afrika Millətlər Kubokunun qalibi müəyyənləşib. Əlcəzairdə keçirilən turnirdə 8 komanda mübarizə aparıb. Bu turnirin finalında isə Əlcəzair və Nigeriya yığmaları üz-üzə gəlib. Ev sahibi Nigeriya yığmasını 1:0 hesabı ilə məğlub edərək çempionluq yaşayıb. Bu Əlcəzair yığmasının tarixi ərzində Afrika Millətlər Kubokunda ilk və son çempionluğu olub. Turnirin ikincisi Nigeriya, üçüncüsü isə Zambiya yığması olub.
