Fransanın “Lion Villerban” klubunda çıxış edən məşhur basketbolçu Nando De Kolo Avroliqanın ən məhsuldar oyunçuları siyahısında 2-ci pilləyə yüksəlib. Sport24.az xəbər verir ki, Litvanın “Jalgiris” klubu ilə oyunda (67:85) 9 xal toplayan De Kolo bu göstərici ilə xal hesabını 4154-ə yüksəldib.
Beləliklə, 35 yaşlı basketbolçu əfsanəvi ispaniyalı müdafiəçi Xuan Karlos Navarranonu (4152) geridə qoyub. Hazırda ilk pillədə 4455 xal toplayan “Panatinaikos” və “Olimpiakos”un sabiq oyun qurucusu Vassilis Spanulis qərarlaşıb.
Xatırladaq ki, 2014-cü ildən MBA-dan Avropaya qayıdan De Kolo bu müddət ərzində “Lion Villerban”a qədər ÇSKA və “Fənərbağça” klublarında çıxış edib.
