Qadın voleybolunda baş məşqçi kimi çalışan Ataman Güneyligillə bağlı maraqlı xəbər var. Sport24.az xəbər verir ki, gazırda Azərbaycanın qadınlardan ibarət voleybol yığmasının baş məşqçisi olan bu türkiyəli mütəxəssis həmin vəzifəyə ötən ayın ortalarında gətirilib.
Son 8 ildə Güneyligil ''Qalatasaray''da işləyirdi. Əslində onun 2 işi birdən icra edəcəyi gözlənilirdi. Belə ki, Güneyligil yığmamızın başına keçməklə yanaşı, həm də Yunanıstan təmsilçisi PAOK-un qadınlardan ibarət voleybol komandasının başına keçmişdi. O, bir neçə gün öncə Yunanıstana yollanaraq rəsmi müqaviləyə imza atmışdı. Amma 41 yaşlı mütəxəssis yeni işinə başlamadan qovulub.
Məsələ burasındadı ki, PAOK fanatları Güneyligilin sosial şəbəkədəki səhifələrini ələk-vələk edərkən orda Atatürklə bağlı çoxsaylı paylaşımlara rast gəliblər. Bu da onların xoşuna gəlmədiyindən fanatlar türkiyəlinin qovulması üçün rəhbərliyə təzyiq göstərməyə başlayıblar. PAOK rəhbərliyi də bunu nəzərə alaraq Güneyligilin müqaviləsini ləğv edib. Amma məşqçi bizim yığmadakı işini təbii ki, davam etdirəcək.
