9-13 sentyabr tarixlərində İspaniyanın paytaxtı Madriddə çimərlik voleybolu üzrə U-22 Avropa çempionatı keçirilib. Sport24.az xəbər verir ki, Qitə birinciliyində oğlanların mübarizəsində 26 ölkədən 32 cüt, qızların yarışında isə 22 ölkədən 28 cüt qüvvəsini sınayıb.
Turnirdə ölkəni İbrahim Məmmədov – Məhəmməd Aslanlı və Səbinə Əlizadə – Leyla Əliyeva cütlükləri təmsil ediblər.
İ.Məmmədov – M.Aslanlı dueti təsnifat mərhələsində İtaliyaya (0:2) və İsrailə (1:2) məğlub olublar.
Əsas mərhələdə çıxış edən S.Əlizadə – L.Əliyeva tandemi isə İtaliya (0:2), Çexiya (0:2) və Danimarka (0:2) komandalarına uduzublar.
Qeyd edək ki, Azərbaycanın çimərlik voleybolçuları sentyabrın 17-20-də Türkiyənin İzmir şəhərində keçiriləcək U-18 Avropa çempionatında da iştirak edəcəklər.
