ABŞ federal məhkəməsi amerikalı şahmatçı Hans Nimannın dünya reytinqinin lideri, norveçli əfsanə Maqnus Karlsenə qarşı qaldırdığı iddianı geri çevirib. Sport24.az xəbər verir ki, ötən ilin payızında Nimann bəlkə də şahmat dünyasında ən çox müzakirə olunan oyunçulardan biri idi.
Sentyabrda nüfuzlu ''Sinquefield Cup'' turnirində Karlsen heç kimin ciddi qəbul etmədiyi Nimanna sensasiyon şəkildə uduzduqdan sonra turnirdən çəkilmək qərarına gəldi. Növbəti gün isə Karlsen 19 yaşlı rəqibini fırıldaqçılıqda günahlandırdıı.
Nimann bu baxımdan daha öncə bir neçə dəfə problem yaşamışdı. Karlsenin ittihamından sonra ''chess.com'' saytı Nimannın keçirdiyi 100-dən çox onlayn oyunun nəticəsini araşdırmağa başladı. Şahmatçının həmin partiyalarda da fırıldağa əl ata biləcəyi, ona kənardan yardım edilə biləcəyi güman olundu. Amma Nimann yalnız uşaq turnirlərində 2 dəfə fırıldağa əl atdığını etiraf edərək digər ittihamları rədd etdi. O da öz növbəsində öz nüfuzunu qorumaq üçün Karlseni, ''Play Magnus Group'' şirkətini, ''chess.com'' saytını və onun rəhbəri Denni Renşi, eləcə də öz həmyerlisi Hikaru Nakamuranı məhkəməyə verdi. Nimann ona şər atıldığını və imicinə ciddi zərbə vurulduğunu bildirərək ümumilikdə 100 milyon dollar təzminat tələb edirdi. Amma əsas ittihamlarla bağlı iddia məhkəmə tərəfindən geri çevrilib.
Bununla belə, Nimannın hələ də daha az əhəmiyyət kəsb edən ittihamlarla bağlı iddiasını davam etdirmək hüququ var.
