2021-ci ildə Mühəndislər Kuboku uğrunda mübarizədə “Red Bull”la amansız mübarizə aparan “Mersedes” hazırda nəinki Avstriya komandası ilə, heç “Ferrari” və “Aston Martin”lə də ayaqlaşa bilmir. Sport24.az xəbər verir ki, heyətində 7 qat dünya çempionu Lüis Hemilton kimi pilotu olan komanda indiki məqamda vəziyyətdən çıxış yolu axtarır. İş elə gətirib ki, bu komanda əzəli rəqibi “Red Bull”a belə oxşamağa hazırdır. “Mersedes”in rəhbəri Toto Volff bunda ayıb heç nəyin olmadığını söyləyib: “Biz “bolid belə olmalıdır” ehkamı ilə yaşamırıq. Biz sadəcə daha sürətli yarış avtomobili hazırlamaq istəyirik. Bolidimiz “Red Bull”a bənzəsə, burda ayıb heç nə olmayacaq. Mən şəxsən buna görə utanmaram. Əsas odur ki, o, sürətli olsun. Hazırda yarış maşımızı demək olar ki, başdan ayağa 0-dan yığırıq”.
