"Real"ın baş məşqçisi Joze Mourinyo Portuqaliya millisinin futbolçusu Kriştiano Ronaldo ilə baş məşqçi Xorxe Jezus arasında yaranmış münaqişəni şərh edib. Sport24.az xəbər verir ki, tanınmış mütəxəssis bu barədə "O Globo"ya danışıb:
"Kriştiano elə Kriştianodur. O, qalib xarakterli insandır. Onda bu cür eqo var, çünki 20 ildə bu xüsusiyyət ona qollar, titullar və rekordlar qazandırıb. Və bu, normal haldır. Lakin indi o, eqosunu idarə etməyi öyrənməlidir. Futbol onu gözləməyəcək. Onun fiziki durumu əvvəlki kimi deyil. Bunu hamı bilir. Özü də bunu anlayır.
Xorxe Jezus yaxşı məşqçidir. O, böyük ulduzlarla necə işləməyi bilir və onlardan çəkinmir. Əgər o, hansısa qərarı verirsə, bunu oyunçunun imicinə görə deyil, komanda üçün ən yaxşısı olduğuna inandığı üçün edir".
Qeyd edək ki, Jezus dünən kçirilən mətbuat konfransında Ronaldonun Millətlər Liqası çərçivəsində Danimarkaya qarşı oyuna start heyətində başlamayacağını açıqladıqdan sonra, futbolçu milli komandanın düşərgəsini tərk edib.
Daha sonra Kriştiano komandadan ayrıldığını təsdiqləyən və gələcəkdə "bütün həqiqəti açıqlayacağını" vəd edən bəyanat yayıb. Sonradan hücumçunun milli karyerasını başa vurmaq qərarına gəldiyi barədə məlumatlar yayılıb.
