II Liqada çıxış edən “Şəmkir” rəhbərliyi ilə komandanın ev oyunlarını keçirdiyi Şəmkir Olimpiya Kompleksinin rəhbərliyi arasında narazılıq yaşanır. Bu barədə Sport24.az-a açıqlamasında klubun prezidenti Vüsal Məmmədov bildirib.
Məmmədov narazılığa səbəb kimi kompleksin direktoru Mahir Şirinovun onlardan yüksək məbləğdə icarə haqqı istəməsini bildirib: “Stadionun direktoru hər oyuna 250, hər məşqə görə isə 70 manat tələb edir. Halbuki, “Göygöl” klubu rayondakı Olimpiya Kompleksindən istifadəyə görə, bir qəpik də ödəmir. Biz niyə verməliyik? Maşınla su gətizdirib, meydanı sulayırıq. Paltardəyişmə otaqlarını öz gücümüzə təmir etdirmişik. Qapı torlarını belə öz vəsaitimiz hesabına alımışıq. Bu adam heç nə etmədən bizdən icarə pulu tələb edir. Ayda 300 manata yaxın durmur. Bu yaxınlarda bahalı gübrələr almışıq ki, heç olmasa ot örtüyündəki çatışmazlığı aradan qaldıraq, əyri yerləri düzəldək. Ayda ona 1100 manatdan çox pulu nəyə görə verməliyik? Deyirəm ki, belə olmaz, niyə Göygöldə komandadan pul almırlar, siz isə bizi dalana dirəyirsiz? Cavabında “onların dövriyyəsi var, almır” söyləyir. Məsələ ilə bağlı nazirliyə şikayət edəcəyimi bildirəndə də “kimə istəyirsiz şikayət edin” söyləyir. Adam utanır, çox şeyi açıb-danışa bilmir”.
Klub prezidenti onu da bildirdi ki, yaxın günlərdə yaşananlarla bağlı Gənclər və İdman Nazirliyinə müraciət edəcək.
Qeyd edək ki, cari mövsümdə II Liqada çıxış edən “Şəmkir” ötən “futbol ili”ndə “Qala-Şəmkir” adı altında Region Liqasında mübarizə aparıb.
RƏŞAD QASIMOV
