"Qarabağ" yenə çətin vəziyyətdən çıxmağı və avrokuboklarda yoluna davam etməyi bacardı.
Qurban Qurbanovun komandası UEFA Konfrans Liqasının pley-off mərhələsinə vəsiqə qazandı. Polşada "Dinamo"ya (Kiyev) 0:1 hesabı ilə məğlub olan ağdamlılar Bakıdakı cavab görüşündə xarakter göstərərək rəqibini iki cavabsız qolla məğlub etdi.
Beləliklə, ilk oyundakı minimal məğlubiyyət arxada qaldı, "Qarabağ" isə növbəti mərhələyə yüksəldi.
Bu, asan başa gələn qələbə deyildi. Qarşıda adı və tarixi ilə Avropa futbolunda özünə yer etmiş Kiyev "Dinamo"su dayanırdı. Belə rəqiblə qarşılaşmada hər detal önəmlidir. Amma "Qarabağ"ın bu mərhələni keçməsi vacib idi və komanda üzərinə düşən işi yerinə yetirdi.
Bəlkə də "Qarabağ"ın ən böyük üstünlüyü məhz belə anlarda özünü göstərir. Nəticə istədiyi kimi olmayanda belə, komanda panikaya düşmür. Qurban Qurbanovun kollektivləri illərdir avrokuboklarda bu xarakteri nümayiş etdirir. İlk oyundakı məğlubiyyətdən sonra Bakıdakı 90 dəqiqədə lazım olan reaksiyanı vermək də bunun növbəti nümunəsi oldu.
İndi isə qarşıda daha bir ciddi sınaq var.
"Qarabağ" pley-off mərhələsində Niderland təmsilçisi "Tvente" ilə qarşılaşacaq. Adı, tarixi və Avropa təcrübəsi olan bu rəqib Azərbaycan çempionu üçün asan olmayacaq. Hətta demək olar ki, qarşıdakı iki oyun "Dinamo" ilə görüşlərdən daha ağır keçə bilər.
"Tvente" əvvəlki illərdəki gücündə olmasa da, III təsnifat mərhələsində Slovakiyanın DAK 1904 klubunu iki oyunun nəticəsinə əsasən 9:3 hesabı ilə məğlub etməsi nəyə qadir olduğunu göstərir. Bu nəticə rəqibin hücum potensialını da ortaya qoyur. Ona görə "Qarabağ"ın qarşıda daha diqqətli və daha intizamlı olması lazım gələcək.
Amma Qurbanovun komandasının da öz üstünlükləri var. Ən başlıcası, belə oyunların təcrübəsidir. "Qarabağ" uzun illərdir Avropanın müxtəlif turnirlərində mübarizə aparır və yüksək səviyyəli rəqiblərlə qarşılaşmalardan qorxmadığını dəfələrlə nümayiş etdirib.
Komandanın heyətində dəyişikliklərin olması isə hələ özünü müəyyən qədər göstərir. Yeni transferlərin hamısının Qurbanovun oyun sisteminə tam uyğunlaşması üçün zamana ehtiyac var. Bu baxımdan "Qarabağ"ın potensialının hələ tam açılmadığını düşünmək olar. Yeni futbolçular kollektivə daha yaxşı uyğunlaşdıqca komandanın oyununda da yüksəliş gözləmək mümkündür.
İndi isə əsas hədəf bəllidir: Konfrans Liqasının əsas mərhələsi.
"Qarabağ" artıq Liqa mərhələsinə bir addım məsafədədir. Qarşıda iki çətin oyun var, amma bu komandanın belə sınaqların öhdəsindən gəlmək üçün kifayət qədər təcrübəsi və xarakteri mövcuddur.
Qurban Qurbanov və onun komandası illərdir Azərbaycan futbolsevərlərinə Avropada çoxsaylı sevinclər yaşadıb. Bəlkə də növbəti sevinc üçün çox gözləməyəcəyik.
İndi bütün diqqətlər "Tvente" ilə oyunlara yönələcək.
İnanırıq ki, "Qarabağ" bu dəfə də öz sözünü deyəcək və Azərbaycan futboluna daha bir gözəl avrokubok gecəsi yaşadacaq.
