"Qəbələ"ylə Premyer Liqada 100-cü oyunumu keçirməklə bağlı xəbəri oxudum. Bilmirdim ki, bu rəqəmə çatmışam. Statistikaya fikir vermirəm. İstənilən halda, xoş oldu. İnşallah, xeyirlisi". Bu fikirləri Sport24.az-a açıqlamasında "Qəbələ"nin baş məşqçisi Elmar Baxşıyev deyib.
Premyer Liqamızda 100-cü matçı son turda evdə "Şamaxı"ylə olan 43 yaşlı mütəxəssis bunu qələbəylə qeyd edib - 2:0. Buna görə sevinən Baxşıyev statistikaya o qədər də önəm vermir: "Bizim üçün əsas statistikaya baxmaq yox, daim inkişaf etmək lazımdı. Sırf o rəqəmlərə önəm vermirik ki, ona çatmalıyıq. Amma bir məşqçi kimi hər zaman inkişaf etməlisən".
Həmsöhbətimiz Premyer Liqamızda debüt matçını belə xatırlayıb: "Yadımdadı, "Sabah"la səfərdə oynayırdıq. Qalib gəldik - 1:0-la başladıq. Uğurlu start oldu . Ümumilikdə hər bir oyun bizim üçün yenilikdi. Ona görə heç birini fərqləndirməzdim".
