Astanada keçirilən Şahmat Tacı uğrunda yarışın sonucu partiyası keçirilib. Yan Nepomnyaşi ilə Dinq Liren arasında klassik variantda keçirilən 14-cü partiyada qalib müəyyənləşməyib. Sport24.az xəbər verir ki, görüş 6 saat yarım davam edib.
Şahmatçılar bu dəfə Nimtsoviç debütünə üstünlük verib. Çinli qrossmeyster ağ fiqurlarla oynasa da, debütdə daha çox çətinlik çəkib. Təasüdüfi deyil ki, rusiyalı şahmatçı ilk 11 gedişi cəmi 7 dəqiqəyə edibsə, asiyalı buna görə yarım saatını xərcləyib.
Nepomnyaşi Dinqin partiya ərzindəki bir neçə səhvindən sonra üstünlük qazansa da, qələbə qazana bilməyib. Hərçənd Lirenin 34-cü gedişdəki kritik səhvi Yanın az qala titulu gətirəcəkdi. Ancaq Nepomnyaşi çox keçmədən özü də kobud səhvlə yadda qalıb.
Partiyanın sonları daha çox taktiki mübarizə ilə yadda qalıb. Yan vaxtı az qalan Dinqi daha çox yormağa çalışıb və rəqibin haradasa səhvə yol verəcəyinə ümid edib. Bu baş verməyincə, sonda "sülh" qeydə alınıb. Beləliklə də 14 partiyanın sonunda 7:7 hesabı qeydə alınıb. Sabah şahmatçılar qalibi müəyyənləşdirmək üçün tay-brekdə qüvvəsini sınayacaq.
