Rusiya Gimnastika Federasiyasının prezidenti İrina Viner ölkəsinin yaxın gələcəkdə Olimpiya Oyunlarına alternativ yarış təşkil etmək istədiyini söyləyib. Sport24.az xəbər verir ki, o, Moskvada başa çatan gimnastika üzrə “Güclülər Kuboku” adlı turnirindən sonra mətbuata açıqlamasında Belarus, Ermənistan, Qazaxıstan, Qırğızıstan, Kipr, Moldova, Suriya, Slovakiya və Özbəkistan idmançılarının çıxışına qiymət verərkən layihəni daha da genişləndirmək istədiyini bildirib: “Ölkəmizə çox yaxşı gimnastlar təşrif buyurdu, onlar burda layiqli şəkildə mübarizə apardı. Doğrudur, onların səviyyəsi hələ ki, rusiyalı gimnastların səviyyəsinə yaxın deyil. Amma maraqlı yarış izlədik. İndi hədəfimiz Şanxay Əməkdaşlıq Təşkilatı, BRİKS (Braziliya, Rusiya Hindistan, Çin, Cənubi Afrika) və MDB ölkələrinin idmançıları arasında turnir keçirməkdir. Bəli, mütləq alternativ Olimpiya Oyunlarını təşkil edəcəyik”.
