Rusiyalı idmançıların müxtəlif beynəlxalq yarışlara neytral statusda buraxıldıqlarını məlumdu. Sport24.az xəbər verir ki, Rusiyanın özündə bu, ən çox müzakirə olunan məsələlərdən biridi.
Bəziləri neytral statusda olsa belə, yarışlarda iştirakı dəstəkləyirsə, bəziləri bu cür formada iştirakın düzgün olmadığını deyir. Məsələn, Bakıda keçiriləcək şahmat üzrə Dünya Kubokuna rusiyalı Sergey Karyakin məhz bu üzdən qatılmaqdan imtina edib. O, Rusiyanı himnsiz və bayraqsız təmsil etmək istəməyib.
Bu arada üzgüçülük üzrə dördqat Olimpiya çempionu Aleksandr Popov da rusiyalı idmançıların yarışlara neytral statusda qatılmasının əleyhinə çıxanlardan biridi. O, gələn il Parisdə baş tutacaq Yay Olimpiya Oyunlarında həmyerlilərinin bu cür formada qatılmasını istəmir: ''Rusiyalı idmançıların gələn il Olimpiya oyunlarında neytral statusda iştirakının qəti əleyhinəyəm. Yalnız bütün atributlarımıza - himn və bayrağa icazə veriləcəyi halda iştirakımızı dəstəkləyərəm. Hərçənd, həmkarlarımdan biri ''belə fürsət həyatda bir dəfə olur'' deyərək neytral statusda olsa belə, Olimpiya oyunlarında iştiraka razılıq versə, onu qətiyyən tənqid etmərəm. Çünki bu, onun mövqeyidi. Hərənin öz fikri var''.
