Argentina millisinin kapitanı Lionel Messi oktyabrın 6-da yığma heyətində vida oyununa çıxacaq. Həmin gün "La Albiceleste" Buenos-Ayresdəki "Monumental" stadionunda Benin yığmasını qəbul edəcək. Sport24.az xəbər verir ki, bu barədə yerli federasiyanın mətbuat xidməti məlumat yayıb.
Baş məşqçi Lionel Skaloni qarşıdakı yoldaşlıq oyunları üçün xarici klublarda çıxış edən futbolçulardan ibarət heyəti açıqlayıb. Siyahıda Messidən əlavə, millidə son oyunlarını keçirəcək Rodriqo De Paul və Covani Lo Selso da yer alıb. Heyətə yerli çempionatda çıxış edən oyunçular da əlavə olunacaq.
Messi Argentina millisində 2005-ci ildə debüt edib. O, ümumilikdə 207 oyun keçirərək 125 qol vurub və 68 məhsuldar ötürmə edib. Messi "La Albiceleste" ilə 2022-ci il dünya çempionatının və "Finalissima"nın qalibi olub, həmçinin 2008-ci ildə Olimpiya çempionu titulunu qazanıb. Bundan əlavə, Lionel iki dəfə (2014 və 2026-cı illərdə) dünya çempionatının finalçısı olub və eyni sayda "Copa America" kubokunu qazanıb.
Qeyd edək ki, Messi DÇ-2026-da IFFHS tərəfindən turnirin ən yaxşı oyunçusu seçilib. Hesabında səkkiz qol olan argentinalı futbolçu bombardirlər yarışında yalnız Kilian Mbappedən (10 qol) geri qalaraq ikinci yeri tutub.
