FİFA qarşıdakı dördillik dövr üçün futbolun inkişafı fonduna 6,35 milyard dollar vəsait ayırmağı planlaşdırır. Sport24.az xəbər verir ki, bu barədə "Associated Press" məlumat yayıb.
Sentyabrın 28-də altı qitə konfederasiyasının rəhbərləri FİFA prezidenti Canni İnfantinodan bu planı əks etdirən məktub alıblar.
FİFA bu təşəbbüs üçün maliyyə ehtiyatlarından — hansı ki, 2026-cı il Dünya Çempionatının uğuru sayəsində əhəmiyyətli dərəcədə artıb — əlavə olaraq 3,5 milyard dollar və ya daha çox vəsait ayıra bilər.
Qeyd olunur ki, 2027–2030-cu illər dövrü üçün ilkin plana əsasən, hər bir milli assosiasiyanın 10 milyon dollar alması nəzərdə tutulmuşdu. Lakin yenidən işlənmiş plan bu ödənişləri dördillik dövr ərzində 25 milyon dollara qədər artırır.
FİFA-nın hesablamalarına görə, ABŞ, Kanada və Meksikanın ev sahibliyi dünya çempionatından əldə olunan gəlirlər də daxil olmaqla, təşkilat 2022–2026-cı illər dövründə təxminən 15 milyard dollar gəlir əldə edib. Bu rəqəm ilkin proqnozları əhəmiyyətli dərəcədə üstələyir.
Bundan əlavə, altı qitə konfederasiyasının hər biri 99 milyon dollar vəsait ala bilər. Mənbənin məlumatına görə, maliyyələşməni artırmaq məqsədilə FİFA-nın maliyyə ehtiyatlarından istifadə təklifi məhz konfederasiyaların özlərindən gəlib.
Bu təklif İnfantino ilə Avropa futbol rəsmiləri arasında gərgin münasibətlərin hökm sürdüyü bir vaxtda irəli sürülüb. UEFA əvvəllər İnfantinonun FİFA turnirlərinin kommersiya hüquqlarının satışı yolu ilə özəl investisiyaları cəlb etmək planına qarşı çıxmışdı.
Planın dekabrda FİFA Şurasının iclasında yekunlaşdırılması və mart ayında təşkilatın konqresində rəsmən təsdiqlənməsi gözlənilir.
Qeyd edək ki, FİFA prezidentliyinə seçkilərin də həmin - 2027-ci ilin martındakı konqresdə keçirilməsi nəzərdə tutulub. İnfantino təşkilata 2016-cı ildən bəri rəhbərlik edir və növbəti müddətə namizədliyini irəli sürməyi planlaşdırır. Daha əvvəl FİFA-nın UEFA-nı İnfantinoya qarşı dezinformasiya kampaniyası aparmaqda ittiham etdiyi bildirilmişdi.
