"Zalsburq"un yarımmüdafiəçisi Lukas Qurna-Dua Acun Ilıcalının sahibi olduğu "Hall Siti" klubuna transfer olunub. Sport24.az "L'Equipe"yə istinadən xəbər verir ki, 23 yaşlı futbolçu yeni klubu ilə 2031-ci ilə qədər müqavilə imzalayacaq.
Fransalı futbolçu tibbi müayinədən keçib. Tərəflər arasında razılaşmaya əsasən, Hall Siti" Qurna-Duanın transferi üçün Avstriya klubuna 4 milyon avro ödəyəcək.
Qeyd edək ki, Qurna-Dua 2022-ci ildə "Sent-Etyen"dən "Zalsburq"a keçib. Ötən mövsümün ikinci yarısını icarə əsasında "Havr"da keçirən futbolçu bundan əvvəl "Roma"da da icarə əsasında çıxış edib. O, "Zalsburq"da 4 mövsüm ərzində 95 oyuna çıxıb və 2 qol vurub. Həmçinin 2023-cü ildə komandanın Avstriya Bundesliqasında çempionluq qazanmasına kömək edib.
