Belaruslu Aleksey Baqayla müqaviləsini pozan "Sumqayıt"ın boş qalan baş məşqçi postuna əsas namizəd müəyyənləşib. Sport24.az-ın əldə etdiyi məlumata görə, bu, vaxtilə Azərbaycanda işləmiş Yuri Maksimovdu.
Belə ki, "Keşlə"nin (hazırkı "Şamaxı"nın) ukraynalı sabiq çalışdırıcısı bu vəzifəyə "1 nömrə"li namizəddi. Onunla hazırda danışıqlar gedir və yaxın günlərdə qərar veriləcək.
Bu yerdə bildirək ki, Maksimov bu il Ukrayna mətbuatına açıqlamalarında Azərbaycandan yenidən təklif aldığını, amma bundan imtina etdiyini vurğulamışdı. İstisna deyil ki, sumqayıtlılar hələ keçən mövsümün qış fasiləsində Ayxan Abbasovla yollarını ayırarkən Yuri Vilyeviçlə əlaqə qurublar və yekunda seçim Baqa üzərində edilib.
Xatırladaq ki, Maksimov 2017/18 mövsümün ikinci yarısında "Keşlə"nin baş məşqçisi olaraq ona tarixində ilk Azərbaycan Kubokunu qazandırıb. 54 yaşlı mütəxəssisin son iş yeri Vətənində 3 il çalışdırdığı "Vorskla" olub və keçən mövsümün sonunda müqaviləsi bitərək klubdan gedib.
