"Bu oyun bizim üçün çox vacib idi. Neçə oyundur ki, qələbə qazana bilmirdik. "Zirə" bizdən çox irəlidə idi. Komanda özünəinamı qaytarmaq üçün qələbə qazanmalı idi". Bu sözləri Sport24.az-ın Qəbələyə ezam olunmuş əməkdaşına açıqlamasında "Qəbələ"nin qapıçısı Səlahət Ağayev Misli Premyer Liqasının XXVII turunda evdə "Şamaxı" üzərində qazanılan qələbəni şərh edərkən deyib.

Təcrübəli qolkiper "qırmızı-qaralar"ın xal itkilərindən və Kubok şansından danışıb: "Futbolda xal itkiləri olur. Biz də istəyirik ki, yaxşı pillələrdə olaq. Xal itirməyi nəyəsə bağlamaq olmaz. Elə oyunlar olub ki, adi qollar buraxmışıq. Və ya hansısa epizodlardan istifadə edə bilməmişik. Azərbaycan Kubokundakı mübarizəyə gəlincə, indidən nəsə demək çətindir. Amma hər iki "cəbhə"də - həm Kubokda, həm də Premyer Liqada sona qədər mübarizə aparacağıq. Qarşıda vacib oyunlarımız çoxdu. Avrokuboklara getmək istəyirik və bunun üçün ən yaxşısını etməyə çalışacağıq".

Ağayev "Şamaxı"da oan rəqib olan qohumu, gənc yarımmüdafiəçi Qurban Səfərovla bağlı da fikirlərini bildirib: "Bacım oğluna uğurlar arzu edirəm. Onun işi qol vurmaq, mənimki tutmaqdı (gülür)".

Qeyd edək ki, "Qəbələ" - "Şamaxı" oyunu 2:0 hesabı ilə başa çatıb.

 

 

MEHMAN SÜLEYMANOV