"Turan Tovuz" digər Premyer Liqa təmsilçilərindən fərqli Novruz bayramı günlərində hazırlıq keçir. Tovuzluların baş məşqçisi Ayxan Abbasov Sport24.az-a açıqlamasıda Mislıi Premyer Liqasında axırıncı oyunlarından - "Səbail"lə martın 16-da səfər matçından sonra komandaya 3 gün istirahət verdiklərini deyib: "Artıq 2 gündü Tovuzda yığışmışıq. Biz tez oynamışıq axı...Ola bilər bizdən sonra oynayanlarda bir az fərqli planlar olduğundan əsasən martın 22-də yığışırlar. Əvəzedici komandamızla yoxlama matçından sonra keçirik birbaşa Premyer Liqa matçının hazırlığına - həftəlik tsiklə. Martın 31-də Tovuzda "Sumqayıt"ı qəbul edəcəyik".
Abbasov I Divizionda çıxış edən "Turan Tovuz-2"i rəqib seçmələrini belə izah edib: "Sözün açığı, heç bir rəqibə təklif eləməmişik. Həm də arada imkan yaranıb və əvəzedicilərdəki futbolçulara da baxmaq istəyirəm. Bu fürsətdən istifadə etməyi lazım bildim. Belə baxanda, oyun praktikadan çox da əziyyət çəkmirik. Onsuz da sıx qrafikə girəcəyik, apreldə Kubokda yarımfinal matçlarımız da olacaq".
Xatırladaq ki, "Turan Tovuz"la ikinci komandası arasında matç martın 25-də saat 16:00-da Tovuz şəhər stadionunda olacaq.
MEHMAN SÜLEYMANOV
