"Şamaxı"nın futbolçusu Əli Səmədov Misli Premyer Liqasında turnir cədvəlinin son pillələrində qərarlaşan komandaların mübarizəsindən söz açıb. Sport24.az-ın Qəbləyə ezam olunan əməkdaşına danışan yarımmüdafiəçi gərgin yarışın getdiyini deyib: "Son dördlükdə "Kəpəz", "Sumqayıt", "Səbail" və "Şamaxı" komandaları mübarizə aparır. Kim daha istəkli, az səhvlə çıxış edəcəksə, o da Premyer Liqada qalacaq. Hər bir xalın əhəmiyyəti böyükdür. Ancaq hər komandanın Premyer Liqada qalmaq şansı var. "Şamaxı"nın da şansı digərləri kimidir. Bu komandalar üçün hər xalın xüsusi önəmi var. Qarşıda çox vacib oyunlarımız var. Bu görüşlərdə bacardığımız qədər yaxşı nəticələr əldə edib vəziyyətimizi yaxşılaşdırmalı və yerimizi möhkəmləndirməliyik. Bu çox vacib amildi".
"Şamaxı" son turfa səfərdə "Səbail"lə görüşəcək ki, hər şey ona da qala bilərr. Səmədovu dinləyək: "Bəli, bu ehtimalı blirik və bu haqda komanda daxilində də söhbətimiz olub. Əlimizdən gələni edəcəyik ki, hər şeyi son tura saxlamayaq. Gənc komandayıq və bu təzyiq üzərimizdə olmasın".
Qeyd edək ki, "Şamaxı" hazırda 20 xalla 9-cu pillədə qərarlaşıb.
MEHMAN SÜLEYMANOV
