Dünya Şahmat Tacı uğrunda mübarizə davam edir. Rusiyalı şahmatçı Yan Nepomnyaşi ilə çinli qrossmeyster Dinq Liren arasında ardıcıl 4 heç-heçədən sonra bu partiyada, nəhayət, qalib gələn tapılıb. Sport24.az xəbər verir ku, ağ fiqurlarla oynayan Dinq 38-ci gedişdə rəqibini təslim olmağa məcbur edərək seriyanın 12-ci oyununda hesabı bərabərləşdirib – 6:6. Hər iki şahmatçının ən çox səhv etdiyi partiya kimi yadda qalıb.
Qrossmeysterlər matçda ilk dəfə Sukertort debütünə üstünlük veriblər. Nepomnyaşi artıq 6-cı gedişdə səhvlə yadda qalıb. Ümumən debütdən sonra Liren 12-ci gedişdə üstünlük qazansa da, bir qədər sonra taxtada vəziyyət tam bərabərləşib.
Əsas hadisələr 19-cu gedişdən başlayaraq yaşanıb. Nepomnyaşi ardıcıl dəqiq gedişlər sayəsində rəqibini çox çətin vəziyyətə salıb. Artıq 26-cı gedişdə Yanın mümkün qələbəsi görünüb. Bu an rusiyalı şahmatçı özünü tamamilə itirib və ardıcıl 4 kobud səhv edib! Din də 2 ciddi səhvlə yadda qalsa da, yenə də üstün tərəf olaraq qalıb.
Qalib gəlməli olduğu partiyanı əldən verməklə heç cür özünə gələ bilməyən Nepomnyaşi 34-cü gedişdə həlledici səhvlə yadda qalıb. Bunu bağışlamayan Liren qısa müddətdə məsələni həll edib. Sabah şahmatçılar 13-cü partiyanı keçirmək üçün lövhə arxasına əyləşəcək.
