Misli Premyer Liqasında qış fasiləsindən sonra ilk tur maraqlı məqamlarda yadda qalıb. Sport24.az onlar arasında "Top-5"i diqqətinizə çatdırır.
"Səbail"lə getdi, "Səbail"lə qayıtdı
XIX turda Şahin Diniyev həm yeni klubda debüt etdi, həm də Premyer Liqamıza qayıtdı. "Səbail"i "sükanı arxası"na keçən 57 yaşlı mütəxəssis "Şamaxı"yla səfər matçında 1:2 hesablı məğlubiyyətlə "siftə" etdi. Diniyev 5 ildən artıq müddətdən - 50 aydan sonra Premyer Liqamıza döndü. Maraqlıdı ki, o, son olaraq çalışdırdığı "Kəpəz"dən məhz "Səbail"ə məğlubiyyətdən sonra istefa vermişdi. Bu, onda Topaz Premyer Liqası adlanan çempionatın XII turunda - 2017-ci ilin noyabrın 18-də 2:3 hesablı məğlubiyyətdən dərhal sonra mətbuat konfransında reallaşmışdı. Göründüyü kimi, "Səbail"in göndərdiyi Diniyev "Səbail"lə də Premyer Liqaya döndü.
Biri antirekordunu yeniləyir, digəri həsrəti bitirir
"Səbail"lə davam edərək, cari çempionatın antirekordçusu olduğunu vurğulayaq. Belə ki, "dənizçilər" ardıcıl 8-ci məğlubiyyətini aldı. Komanda yeni baş məşqçisi ilə də antirekordunu yenilədi. Bunadək ardıcıl məğlubiyyətlərdə antirekordçu "Kəpəz" idi ki, ilk 5 turda uduzmuşdu.
"Səbail"in son dəfə xalı məhz "Şamaxı"yla görüşdə qazanması diqqət çəkir. Bu, XI turda evdə 0:0 hesablı heç-heçəylə olmuşdu. "Şamaxı" isə son qələbəni XIV turda - keçən ilin noyabrın 11-də evdə "Sumqayıt" üzərində 4:2 hesabıyla qazanmışdı. Vüqar Əsgərlinin komandası 76 gündən sonra qələbəyə sevindi.
Birinci dəfə, o da "Neftçi"ylə...
Bu turda yalnız bir komanda qol vura bilmədi. Bunun Azərbaycanın ən "qoca" klubunun olması diqqət çəkir. Bəli, yalnız "Neftçi" bu ilin ilk turunda qol belə vura bilmədi. Çünki "Sabah"a məğlubiyyət 0:2 hesabıyla reallaşdı. Belə hal ki, 10 komandadan 9-u qol vursun. 1-i buna nail olmasın - cari çempionatda ilk dəfə baş verdi. O da maraqlıdı ki, "Neftçi" "Sabah"la indiyədək çempionada 17 matçın hamısında qol vurmuşdu və ilk dəfə buna nail ola bilmədi.
...hələ "abunəçi" olması reallığı da var
Bu uğursuz məqam da "Neftçi"ylə bağlıdı. Məlumdu ki, çempionatımızda hələ "İnter"in bolqarıstanlı prezidenti Georgi Nikolovun gətirdiyi "abunəçi" termini var. Bu da bir komandanın digərini Premyer Liqada hər 4 matçda məğlub etməsidi. Buna doğru məhz "ağ-qaralar" gedir. Çünki "Neftçi" həmşəhərliləri "Sabah"la 3-cü görüşdən də xalsız ayrıldı. Halbuki, Murad Musayevin gəlişinədək Masazır təmsilçisi "Neftçi"yə heç vaxt qalib gəlməmişdi. Musayevlə isə "Sabah" "Neftçi"ylə Premyer Liqada 6 qarşılaşmanın artıq 4-də qələbə sevinci yaşayır.
Məlumdu ki, 2011-ci ildən bu yana çempionluqlar "Qarabağ"la "Neftçi" arasında olur. "Ağ-qaralar"ın bu prisipial rəqibinə bir çempionatda hər 4 matçda uduzması olub. Amma digərinə yox. Hətta "Qəbələ" Roman Qriqorçukun vaxtında da nə qədər güclü olsa da, "Neftçi"ni bir çempionatda xaslız qoyduğu olmayıb.
Burda əsas tənqid hədəfi "ağ-qaralar"ın baş məşqçisi Lourentsiu Regekampf olmalıdı. Çünki rumıniyalı mütəxəssis Antalyadakı yoxlama matçlarında nəticənin onun üçün heç bir önəm daşımadığını, bütün diqqətini "Sabah"la duelə yönəltdiyini açıqlamışdı. "Sabah"la da matç oldu, heç bir dəyişmədi - "Neftçi"də nə oyun var, nə də nəticə. Yenə bərbad oyun, yenə üzücü məğlubiyyət. Bu idimi səni gözləntin, ay Rege?
Vurmadı-vurmadı, ikisi birdən oldu
"Turan Tovuz" "Qarabağ"la ardıcıl 3-cü məğlubiyyət alaraq o da "abunəçi"liyə namizəd oldu. Burda diqqət çəkdiyimiz məqam odur ki, Ayxan Abbasovun komandası liderə qol belə vura bilməmişdi. Amma indi iki qolu birdən vurmaq mümkün oldu. Qurban Qurbanovu komandası bu çempionatda 2 dəfə qələbə qazana bilmədiyi matçlarda 1 qol belə buraxmamışdı. Amma "Qarabağ"ın bu çempionatda 1-dən çox qol buraxması olmuşdu. Bu, ilk dövrədə "Sabah"ı evdə 4:3 hesabıyla məğlub etdiyi matçdı.
