Azərbaycan yığması UEFA Millətlər Liqasının qrup mərhələsinin son oyunlarını Slovakiya (22 sentyabr) və Qazaxıstana (25 sentyabr) qarşı keçirəcək. Baş məşqçi Canni de Byazi A milliyə bir neçə debütant çağırıb ki, onlardan biri də Ozan Can Kökçüdür.
Yay fasiləsində Niderlandda “Telstar”ı “Eyndhoven” klubuna dəyişən U-21 yığmamızın sabiq üzvü üçün mövsüm uğurlu start götürüb. 24 yaşlı yarımmüdafiəçi millinin düşərgəsinə yollanmamış Sport24.az-ın suallarını cavablandıraraq bu parlaq performansını millidə də davam etdirmək arzusunda olduğunu gizlətməyib. Ozan Can Kökçü həmçinin gələcəklə bağlı böyük hədəflərinin olduğunu da vurğulayıb.
- Yeni transfer olduğun “Eyndhoven”ə sanki gözləniləndən tez uyğunlaşmısan...
- Həqiqətən də, adaptasiya olunmaq üçün bir neçə həftə çox qısa müddətdir. Baş məşqçinin oynatdığı mövqe və tələbləri, onsuz da, mənə yad deyildi. Əlbəttə ki, tez uyğunlaşmağımda komanda yoldaşlarımın və məşqçilərimin köməyi çox oldu.
- İlk 8 turdan sonra “Eyndhoven” I Divizionda turnir cədvəlinin 2-ci pilləsində qərarlaşıb və 4 qolla komandanın ən məhsuldar oyunçularındansan. Həm şəxsi, həm də komanda baxımdan cari mövsümlə bağlı hədəflərin nələrdir?
- Komanda olaraq minimum pley-off mərhələsinə qatılmaq istəyirik. “Eyndhoven” ötən mövsüm bir neçə xal əskikliyi ilə Erediviziyaya birbaşa vəsiqə şansını qaçırıb. Ona görə də bu dəfə hədəflər böyükdür. Deyə bilərəm ki, komandada öz yerimi artıq tapa bilmişəm. Özümü yaxşı tərəfdən göstərə bilirəm. Bu mövsüm qollar və assistlərlə komandama kömək olmaq istəyirəm. Mövsümün sonunda isə bu klubla Erediviziyaya yüksəlməyi hədəfləyirəm.
- İlk dəfə Azərbaycan millisinə çağırıldın. Nələr hiss edirsən?
- Bir neçə il U-21 yığmasında oynadım. Ondan sonrakı hədəf də əsas milli idi. Dəvət almaq qürurvericidir. Çox xoşbəxtəm və əlimdən gələnin ən yaxşısını etməyə hazıram.
- Millətlər Liqasında qrup mərhələsinin son oyunlarında Slovakiya və Qazaxıstanla qarşılaşacaqsınız. Yığma ilə necə başlanğıc xəyal edirsən?
- Futbolçu kimi çıxdığım hər oyunda qələbə qazanmaq istəyirəm. Slovakiya və Qazaxıstanla görüşlərdə də xal qazanmağa köklənmişik. İki yaxşı komandaya qarşı çıxış edəcəyik. Ancaq uğurlu nəticə üçün sona qədər mübarizə aparmaq lazımdır. Bundan ötrü komanda olaraq əlimizdən gələni əsirgəməyəcəyik.
- Niderlandda Azərbaycan futbolu ilə maraqlanırlarmı, sizdən nəsə soruşurlarmı?
- Azərbaycanın necə yer olduğunu, futbolunun nə cür olduğunu bəzən soruşurlar. Amma detalları ilə suallar və ya söhbət olmur.
- Gələcək karyeranla bağlı hədəflərin nələrdir? Yenidən Azərbaycana qayıdarsanmı, yoxsa daha böyük liqalarda oynamaq arzusundasan?
- Hazırda bütün diqqətimi cari mövsümə yönəltmişəm. Bu il ən yaxşı şəkildə çıxış edib, mövsümü müsbət nəticələrlə tamamlamaq istəyirik. Futbolda sabah harada olacağını heç vaxt təxmin edə bilmirsən. Ona görə də hər şeyə açıq olmaq lazımdır. Təbii ki, hədəflərim var və bunları həyata keçirmək üçün hər məşqdə, həm oyunda maksimum gücümlə çalışıram.
KAMAL RZA
