Dünən keçirilən “Kəpəz” - “Səbail” matçından sonra Gəncə klubunun İdarə Heyətinin sədri İlqar Nadiri jurnalistlərin suallarını cavablandırıb. Sport24.az xəbər verir ki, Nadiri əvvəlcə komandanın 0:3 hesablı məğlubiyyətinə münasibət bildirib.
- Hesabın belə olacağını gözləmirdik. Erkən qol buraxdıq. Bu da oyun planına ciddi təsir etdi. Qapımızda gördüyümüz ikinci qol “Səbail” adına gözəl alındı. Ondan sonra oyunun nizam-intzamı pozuldu. Hesab daha fərqli ola bilərdi.
- “Neftçi” və “Qarabağ”dan xallar alsanız da, digərlərinə məğlub olmusunuz. Sizə elə gəlmir ki, ortabab rəqiblərə qarşı komandanızda motivasiya çatmır?
- Əslində, çempionatda iştirak edən komandaların hamısı bir-birindən xal almaq iqtidarındadı. “Səbail”lə görüşə də yaxşı hazırlaşmışdıq, öz meydanımızda qələbə qazanmaq istəyirdik. Bu qalibiyyət bizə çox lazım idi. Ancaq alınmadı.
- Elmir Tağıyevin son durumu necədir?
- Elmir zədələndi. Tam olaraq həkim müayinəsindən keçəcək.
- Azarkeşlərin “İstefa” şüarını necə qarşıladınız?
- Gəncədə belədir, nəticə olmayanda, komanda baxımlı oyun ortaya qoymayanda azarkeşlər narazı qalırlar. Mən özüm də hələ şokdan ayılmamışam. Təəssüfedici oyun idi. Komandanın meydanda nə etmək istədiyini biz özümüz də başa düşmədik.
- Futbolçuların hazırlıq səviyyəsinin aşağı olması nə ilə bağlıdı?
- Komanda təlim-məşq toplanışı keçməyib, istədiyimiz futbolçuları dəvət edə bilməmişik. Bunların hamısı nədənsə qaynaqlanır. Adətən yay fasiləsində təlim-məşq toplanışı olmalı, yoxlama görüşləri keçirilməlidir. Biz hələ indi də futbolçu axtarırıq. Haradasa 10 gün əvvəl bizə futbolçu təklif etdilər, hazırlıq səviyyəsi istənilən vəziyyətdə deyildi. Kollektiv yenidən formalaşır, zaman lazımdı. Bu zaman ərzində də itirəcəyimiz belə oyunlar olacaq.
- Oyunçu gətirə bilməməyinizin səbəbi nədir?
- 80 faiz maliyyə çatışmazlığından qaynaqlanır.
- FİF-lə görüşdə müsbətə doğru hansısa dəyişiklik var?
- Biz hər gün danışırıq. Nəsə eləməyə çalışırıq. Vəziyyətdən çıxmaq lazımdı.
- Bir ara hansısa şirkətlə danışıq apardığınız barədə məlumat yayılmışdı. Bu, doğrudu?
- Azərbaycan futbolunda ictimaiyyət o qədər kiçikdi ki, adi qığılcım olanda belə hər kəs bilir. Elə bir şey yoxdu ki, onu qapalı saxlayaq. Əksinə, biz də işıqlandırılmasının tərəfdarıyıq ki, futbola gəlmək istəyən şirkət bir az da həvəslənsin, proses sürətlənsin.
- Belə söhbət gəzir ki, iş adamları “Kəpəz”ə dəstək olmaq istəsə də, şəhərdəki mühitə görə yaxın durmurlar?
- Biz istənilən mühiti, strukturu yaratmağa hazırıq. Yetər ki, gəlsinlər, komandaya ciddi dəstək versinlər. Öz adımdan söz verirəm ki, istənilən formada danışığa hazıram. Rəhbərlik səviyyəsində təmsil olunması, rəhbər olması belə mümkündü.
- Siz geri çəkilməyə hazırsınız?
- Heç bir problem yoxdur. Əsas odu ki, komanda yaxşı olsun. Buradayamsa, o demək deyil ki, komandanı əlimdə saxlayacağam, heç kimə yaxın durmağa icazə verməyəcəyəm. Gücüm çatan budu, bu qədər mübarizə apara bilirik. Şəxsən özüm müraciət edirəm, çalışıram. Komandaya dəstək olmaq istəyənləri necə lazımdısa qarşılamağa hazırıq.
- “Kəpəz”ə əlavə nə qədər vəsait lazımdı ki, normal mübarizə apara bilsin?
- Premyer Liqada iştirak edən komandanın lisenziya büdcəsi 2 milyon manatdı. Nə qədər lazım olduğu barədə dəqiq rəqəm deyə bilmərəm. Ancaq indi bu büdcə ilə çıxış edən komanda yoxdu. Premyer Liqa klublarının büdcəsi ən azı bunun ikiqatıdı.
- Akademiyada necə, müsbətə doğru irəliləyiş var?
- Akademiyada işlər yekunlaşmaq üzrədi, yaxın vaxtlarda açılış tarixi dəqiqləşəcək. Açılış tədbiri nəzərdə tutulub.
RƏŞAD QASIMOV, Gəncə
