Darıxmışdıq. Televiziyadan da, lap canlı da Konfrderasiyalar Kubokunu izləyə bilərsən. Ancaq bizim futbol üçün çox darıxmışdıq. Adəti üzrə mövsüm çempionatla deyil, avrokubok həyəcanı ilə başladı.
Mərdəkanda bir çox debütlər rəsmiləşdi. “Zirə” tarixində ilk dəfə Avropa Liqasında iştirak etdi. Ayxan Abbasov ilk dəfə qitəmiqyaslı yarışlarda baş məşqçi kimi debüt etdi. Onun kimi bir neçə futbolçu üçün bu, bir ilk idi. Riçard Qadze “Zirə”nin tarixində ilk avrokubok qolunun müəllifi oldu...
Bəli, rəqib Lüksemburq təmsilçisi idi. Bəli, bir sıra futbolçuları həvəskar idi. Ancaq bu komanda əksər hallarda avrokuboklarda ilk mərhələni keçib. Beynəlxalq təcrübə baxımından da “Zİrə”dən üstündülər. Elə çempionluq uörunda mübarizədə də əslində qalib gəliblər. “Düdelanj”la eyni xal toplayan təmsilçimizin rəqibi şəxsi görüşlərin birində qalib gəlib, digərində bərabərə qalıb. Lakin Lüksemburqda xallar eyni olanda ilk olaraq top fərqinə baxılır ki, bu göstəricidə də “Düdelanj” üstün olub.
Bax, belə bir durumda “Zirə” ilk oyundan nəvbti mərhələyə yüksəlmək üçün yaxşı şans verən 2:0 hesablı üstünlüklə ayrıldı. İndi bu qələbəni necə kiçiltmək olar? Bəli, qəsəbəlilərin oyununda çatışmazlıqlar var idi. Bəli, rəqib asanlıqla hücum və müdafiə xətti arasındakı dəhlizə daxil olurdu. Bəli, Ayxan Abbasovun komandası ideal formadan hələ uzaqdı. Ancaq fakt budu ki, “Zirə” bunu bacardı! Qələbələrimizi kiçiltməyək. Ötən gecə “Zİrə” bir tarix yazdı. Elə Azərbaycan futbolu adına da bir tarix!
“İnter”. Bu komandanın adı gəldikdə, ağıldan keçən ilk ifadə “yazıqlar”dı. Nə bəlalar çəkdi başı bu klubun? Nə transfer edə bildilər, nə də bir sıra oyunçunu saxlaya. Üstəlik maliyyə burulğanı, tez-tez dəyişən rəhbərlik və s. və i. Ancaq dünən “İnter” bir başqa aləm idi. Bütün problemlər meydançadan kənarda qalmışdı. Həmin 90 dəqiqədə biz vahid mexanizm gördük. Həmin mexanizmin bu cür işlək olmasını təmin edən ustanın adı Zaur Svanadzedi. Siz komandası vurduğu hər qoldan sonra gürcü məşqçinin mimikasına diqqət yetirdiniz? Yetirmədinizsə, videotəkrara baxın, peşman olmazsız. Svanadzenin bir siniri belə tərpənmədi. Bu, onun məşqçi fəlsəfəsidi. Yetirmələri məşqçilərinə baxıb, ibrət götürür. O da onlar kimi atılıb-düşsəydi, arxayınlığın təməlini qoymuş olacaqdı. Yox, Svanadze heç final fitindən sonra da gülümsəmədi. Niyə? Çünki Svanadze üçün bu matç 180 dəqiqənin tamamında – Bakıda sona çatacaq. Hələliksə, 90 dəqiqədən sonra təmsilçimiz 3 topluq qandikap qazanıb.
Fədakar qələbədə hər kəs pay sahibidi. Ancaq Skarlatake!.. Rumıniyalı futbolçunun bilyard dəqiqliyi ifa etdiyi cərimə zərbələrinə baxdıqda, bu qolların müəllifinin 8 komandalı çempionatda oynamasına kim inanar? Rauf Əliyevin Matrosovsayağı hər "mərmi"yə başını qoymasını gördükdə, kim deyər ki, bu çempionat yararsızdı? Deməli, çempionatımız o qədər də kiçik deyil. Deməli, klublara inanmaq üçün kifayət qədər əsasımız var. Bu inamı azarkeşlərə də daşımalıyıq. Belədə, uğurlarımızın da sayı çox olacaq. Necə ki, ötən gecə iki klubumuz 5 cavabsız qolla azərbaycanlı futbolsevərlərdən “5” aldı!
CEYHUN ƏLİYEV
