Formula 1 üzrə mövsümün ilk Qran-prisində uğursuzluqla üzləşən komandalardan biri də “Alfa Tauri” oldu. Sport24.az xəbər verir ki, yüksək yerlər uğrunda mübarizə aparmasa da, komandanın belə inamsız təsir bağışlayacağını tam olaraq gözləməyə dəyməzdi.
Pilotlarının müvafiq olaraq 11 və 14-cü yeri tutması komandanın rəhbəri Frants Tostu qəzəbləndirib. Amma bunun günahını mühəndislərində görür: “Bolidimizin sürətli olması üçün çox iş görməliyik. Mühəndislərimiz böyük işlər gördüyümüzü söyləmişdilər, amma mən artıq onlara inanmıram. Mən dövrədə sürətli maşın görmək istəyirəm. Bütün qış boyunca mənə yarış avtomobilimizi təriflədilər. Amma Bəhreynə gəlib görürük ki, pis gündəyik. Belə mühəndislər haqda nə deyə bilərəm axı? Sual olunur ki, biz doğru istiqamət üzrə hərəkət edirik? Kağız üzərində inkişaf etdiyimizi mənə göstərməyə çalışdılar. Artıq rəqəmlərə də inanmıram”.
