Ukrayna millisinin sabiq hücumçusu Roman Zozulya Çempionlar Liqasının yarımfinal mərhələsində keçirilən “Milan” – “İnter” oyununda “San Siro”da Novak Cokoviçin yanında əyləşdiyinə görə Andrey Şevçenkonu tənqid edib. Sport24.az xəbər verir ki, onun fikrincə, Şeva serbiyalı tennisçi ilə münasibət qurmamalı idi.
Çünki ATP lideri Rusiyanı dəstəkləyir.
Sosial şəbəkə vasitəsilə Zozulya bunları yazıb: “Səni futbola dəvət edirlərsə və yanında Rusiya meyilli idmançı oturursa, heç bir halda sevinc dolu baxışların ilə onun yanında əyləşə bilməzsən. Ağlı başında olan ukraynalı bu eybəcərlik ilə bir sırada oturmaz. Bəs, bizim milli qürurumuz niyə orada əyləşib? Uzun müddət bu haqda susmuş, hər insanın səhv edə biləcəyini düşünmüşəm.. Ancaq indi onun səhvləri sistem halını alıb. Bunlar sadəcə, səhvlərdirmir?”
