"Betis"in baş məşqçisi Manuel Pelleqrini La Liqanın növbəti turunda səfərdə "Vilyarreal"ı 2:1 hesabı ilə məğlub etdikləri oyunu dəyərləndirib. Sport24.az xəbər verir ki, çilili mütəxəssis komandasının xüsusilə hücumdakı çıxışından məmnun qaldığını bildirib.
"Ümumilikdə, möhtəşəm oyun oldu. Çox xoşbəxtəm. Futbol həm də tamaşadır və düşünürəm ki, hər iki komanda necə oynamağı və hücum etməyi bacarır. Çox dolğun oyun keçirdik. İkinci hissədə matçı bitirə biləcəyimiz 4-5 çox real qol fürsətimiz oldu. Onları qola çevirə bilmədik, amma müdafiədə möhkəmliyimizi qoruyaraq hücumu davam etdirdik. Öz meydanında çox güclü komandaya qarşı bu qədər fürsət yaratmaq asan deyil. Komandamın göstərdiyi oyundan çox razıyam", - deyə Pelleqrini vurğulayıb.
Təcrübəli məşqçi hesabın 1:0 olduğu dönəmdə yaranan gərginliyə də toxunub:
"Futbolda yalnız bir top fərqi ilə öndə olarkən çoxsaylı fürsətləri qaçırsanız, bunun cəzasını çəkə bilərsiniz. Müdafiədə diqqətli olduq və rəqibin qapısına getməkdə davam etdik. Sadəcə, son toxunuşlarda bir qədər tələsdik və dəqiq olmadıq. Ümumilikdə çox xoşbəxt idim. Xüsusilə də "Vilyarreal"a bizə zərər verəcək ciddi fürsətlər verməməyimiz vacib idi. İkinci hissədə isə demək olar ki, heç bir şans yaratmadılar".
Pelleqrini mövsümə qələbə ilə başlamağın əhəmiyyətini də qeyd edib. O, qarşıdakı sıx təqvimə baxmayaraq komandanın arxayınlaşmamalı olduğunu söyləyib.
"İlk oyunlarda qələbə ilə başlamaq çox vacibdir. Qarşıda sıx Çempionlar Liqası təqvimi var. Milli komandaların oyunlarına qədər daha 6 xal toplamağa çalışmalıyıq. Amma əldə etdiyimiz nəticələrin növbəti matçda avtomatik olaraq qələbə qazanacağımız anlamına gəlmədiyini bilməliyik. Arxayınlaşmamalıyıq. Bütün komandaların güclü olduğunu nəzərə almalı və indi öz meydanımızda 3 xal qazanmağa çalışmalıyıq", - deyə mütəxəssis əlavə edib.
