İndian-Uells “Masters” turnirində korta “Spartak” forması ilə çıxaraq böyük ajiotaja səbəb olan rusiyalı tennisçi Anastasiya Potapova turnirdən kənarlaşdırılmasa da, WTA tənqid atəşinə tuş gəlib. Sport24.az xəbər verir ki, qurumun rəhbəri Stiv Saymon vəziyyətin nəzarət altında olduğunu söyləyərək ictimaiyyəti sakitləşdirməyə cəhd edir: “Əlbəttə, Ukraynada baş verənlər faicədir. Biz heç vaxt Rusiya hakimiyyətinə bu müharibəyə görə haqq qazandıra bilmərik. İndian-Uellsdə korta Rusiya klubunun simvolikası ilə çıxan Anastasiya Potapova ilə birbaşa söhbət etmişik. Ona öz xəbərdarlığımızı bildirmişik. Həqiqətən də belə hərəkətlər yolverilməzdir. Bir daha belə halın yaşanacağını düşünmürəm. Biz ümumiyyətlə, Rusiya və Belarusdan olan tennisçilərlə danışırıq. Onlar belə turnirlərdə ölkələrini təmsil etmədiklərini anlamalıdırlar. Məncə, bunu başa düşmək elə də çətin olmamalıdır”.
