Azərbaycan cüdoçuları Birləşmiş Ərəb Əmirliklərinin paytaxtı Əbu-Dabidə təşkil olunacaq növbəti beynəlxalq sınağa hazırlaşırlar. Sport24.az xəbər verir ki, bu barədə Azərbaycan Cüdo Federasiyasının (ACF) mətbuat xidməti məlumat yayıb. 29-31 oktyabr tarixlərində keçiriləcək "Böyük Dəbilqə" turnirində ölkəmizi 11 idmançı təmsil edəcək.
Milli komandamız yarışda 9 çəki dərəcəsində mübarizə aparacaq. Qadınlardan Könül Əliyeva (48 kq), Gültac Məmmədəliyeva (52 kq), Südabə Ağayeva (70 kq), Madina Kaisinova (+78 kq), kişilərdən Balabəy Ağayev (60 kq), Ruslan Paşayev (66 kq), Kamran Süleymanov, Hidayət Heydərov (hər ikisi 73 kq), Elcan Hacıyev (90 kq), Uşanqi Kokauri və Camal Qamzatxanov (hər ikisi +100 kq) tatamiyə çıxacaq.
İdmançılarımıza kişilərdən ibarət yığmanın böyük məşqçiləri Elçin İsmayılov, Slavko Tekiç, qadınlar millisinin baş məşqçisi Amina Abdellatif və məşqçi Tərlan Kərimov rəhbərlik edəcəklər.
Qeyd edək ki, Los-Anceles-2028 Yay Olimpiya Oyunlarına reytinq xalları verən "Böyük Dəbilqə"də 60 ölkədən 400-ə yaxın cüdoçunun tatamiyə çıxması gözlənilir. Turnirin ədalət təmsilçiləri arasında ACF Hakimlər Komitəsinin üzvü, A kateqoriyalı beynəlxalq hakim Nazim Umbayev də yer alacaq.
