"Sabah" UEFA Çempionlar Liqasında daha bir tarixi səhifə yazdı. Danimarkada "Orhus"a 1:2 hesabı ilə məğlub olan Azərbaycan çempionu cavab görüşündə tamamilə fərqli sima ortaya qoydu və rəqibini 4 cavabsız qolla darmadağın edərək pley-off mərhələsinə yüksəldi.
Möhtəşəm oyun, layiqli qələbə və nəticə etibarilə böyük uğur!
Bəlkə də ən gözəl tərəfi budur ki, "Sabah" sadəcə mərhələ adlamadı, bunu necə bacarmaq lazım olduğunu da göstərdi. İlk oyundakı məğlubiyyətdən sonra komandanın qarşısında kifayət qədər çətin vəzifə dayanırdı. Lakin doğma meydanda çıxan "Sabah" sanki həmin hesabı heç düşünmürdü. İlk dəqiqələrdən rəqib üzərində təzyiq quran, öz oyununu diktə edən və sonadək mübarizə aparan komanda gördük.
Nəticədə 4:0!
Bu qələbənin qarşılığında "Sabah" UEFA Avropa Liqasının liqa mərhələsində iştirakını da təmin etdi. Yəni bundan sonra hansı ssenarinin baş verməsindən asılı olmayaraq, "Sabah"ın Avropadakı mübarizəsi davam edəcək. Bu isə klubun tarixində yeni bir mərhələnin başlanğıcıdır.
Təbii ki, Çempionlar Liqasının əsas mərhələsinə düşmək arzusu var. Kim istəməz ki? Qitənin ən böyük klub turnirində liqa mərhələsində mübarizə aparmaq həm klub, həm futbolçular, həm də Azərbaycan futbolu üçün möhtəşəm hadisə olardı. Amma bunu "Sabah" üçün tələbə çevirmək, məncə, ədalətli olmaz.
Çünki qarşımızda hələ yolun başlanğıcında olan, addım-addım böyüyən bir klub var.
"Sabah" ilk dəfə Azərbaycan çempionu kimi UEFA Çempionlar Liqasında mübarizə aparır. Və debüt etdiyi turnirdə artıq pley-offa qədər gəlib çatıb. Üstəlik, bu komanda Çempionlar Liqasının himnini Bakıda yenidən səsləndirəcək. Bu, Azərbaycan futbolu üçün də xüsusi məqamdır. Ölkəmizdə bunu daha əvvəl yalnız "Qarabağ" bacarmışdı.
İndi "Sabah"ın qarşısında daha bir böyük imkan dayanır. Komanda Çempionlar Liqasının liqa mərhələsinə vəsiqə qazanmaq istəyəcək. Açığı, Bakıdakı 4:0-dan sonra bunu arzulamaqdan daha artığını etmək – buna inanmaq da tamamilə normaldır.
Çünki "Sabah" meydanda buna layiq olduğunu göstərir.
Ən əsası isə komanda artıq təkcə nəticələri ilə yox, oyunu ilə də inam yaradır. "Orhus"a qarşı cavab matçındakı futbol göstərdi ki, "Sabah"ın Avropada daha böyük hədəflər üçün potensialı var. Qarşıda daha güclü rəqib olacaq, daha çətin oyunlar keçiriləcək. Amma bu mərhələyə qədər gələn komandanın da artıq həmin sınaqlara hazırlaşmaq üçün kifayət qədər səbəbi və təcrübəsi var.
Bu gün "Sabah"dan sadəcə nəticə gözləmək yox, onun böyüməsinə şahid olmaq daha maraqlıdır.
Bir neçə il əvvəl qurulan layihə bu gün Azərbaycan çempionu kimi Çempionlar Liqasının pley-offunda mübarizə aparır. Sabah isə bəlkə də daha böyük bir tarix yazılacaq.
Nə olursa-olsun, bu "Sabah" artıq böyük iş görüb.
Amma hiss olunur ki, bu hekayənin ən maraqlı səhifələri hələ qabaqdadır.
