Gəncədə şəhidlərin xatirəsinə həsr olunan uşaqlar arasında (2014/15-ci il təvəllüdlülər) futbol turniri keçirilib. Sport24.az xəbər verir ki, Gəncə, Tovuz və Mingəçevirin qatıldığı turnirdə 4 komanda iştirak edib.
Gəncəni "Kəpəz" və "Lokomotiv", Tovuzu "Turan Tovuz", Mingəçeviri UGİM təmsil edib.
Gəncənin ən tanınmış uşaq məqşçisi, Əməkdar məşqçi Konstantin Abramenkonun adını daşıyan "Lokomotiv" stadionunda təşkil olunan turnirin açılış mərasimi torpaqlarımızın azadlığı uğrunda canından keçən şəhidlərin ruhunun bir dəqiqəlik sükutla anılması və Azərbaycan Dövlət Himninin səsləndirilməsi ilə başlayıb. Sonra çıxış edən Gəncə "Şəhid Anaları" İctimai Birliyinin (İB) sədri, Şəhid Hacı Rauf Əsgərovun anası Brililiant Əsgərova şəhidlərə və onun ailələrinə göstərilən diqqət, qayğıya görə turnirin təşkilatçılarına minnətdarlıq bildirib: “44 günlük müharibədə öz həyatlarını fəda edərək Azərbaycanın torpaqlarını azad edən bütün igid balalarımız qürurumuzdu. Onlar öz canlarından keçdilər ki, bu gün hər kəs rahat, firəvan yaşasın. Şəhid övladlarımıza, onların ailələrinə, övladlarına hamı böyük hörmət və diqqətlə yanaşırlar. Bu gün şəhidlərin xatirəsinə keçirilən bu futbol turniri də bu qəbildən olan tədbirlərdəndi. Xalqımız bir daha sübut edir ki, şəhidlərimiz heç zaman unudulmayacaqlar. Onlar hər bir evdə, hər kəsin qəlbində yaşayacaq”.
Sonra çıxış edən Gəncənin millət vəkili Müşfiq Cəfərov bu günlərdə uşaqların hüquqularının müdiəsi günü olduğunu xatırladaraq şəhid övladları da daxil olmaqla bütün uşaqları təbrik edib. O bildirib ki, bu kimi idman yarışları uşaqların həm sağlam ruhda böyüməsinə, həm də idmanın, futbolun Gəncədə və regionda daha da inkişafına böyük töhvə verəcək. Cəfərov şəhidlərin və onların ailələrinin daim dövlətimizin, onun rəhbəri Ali Baş Komandan İlham Əliyevin, birinci vitse-prezident Mehriban Əliyevanın diqqət mərkəzində olduğunu vurğularaq hər zaman yaddaşlarda, qəlblərdə olduğunu söyləyib.
Açılış mərasimində Türkiyə Cümhuriyyətini Gəncə Konsulluğunun nümayədəsi Eyyub Keçər, Gəncə şəhər Gənclər və İdman İdarəsinin rəisi Həmid Nəsirov, Gəncə YAP-ının sədri Bayram Aslanov, Gəncə Olimpiya Kompleksinin direktoru İntiqam Hüseynov, Gəncə Ağsaqqallar Şurasının nümayəndələri çıxış edərək, şəhidlərin ruhunun daim əziz olduğunu, heç zaman yaddan çıxmayacaqlarını, bu kimi yarışların uşaq idmanının inkişafında böyük rolunu qeyd ediblər.
Sonra turnirin təşkilatçılarından olan iş adamı Çapay Məmmədovun və AFFA-nın Kütləvi Futbol Departamentii rəhbəri Fərrux İsmayılovun hazırladıqları xüsusi xatirə hədiyyələri şəhid övladlarına təqdim olunub.
Rəsmi hissədən sonra yarışlara start verilib. Matçlar hərəsi 15 dəqiqədən ibarət 2 hissədən ibarət olub. Hakimliyi gəncəli veteran futbolçular Rövşən Əhmədovla Emin Mustafayev yerinə yetiriblər.
İlk yarımfinalda "Lokomotiv" mingəçevirliləri böyük hesabla məğlub edib - 5:0. Digər yarımfinalda da qalib gəncəlilər olub. Amma "Kəpəz"lə "Turan Tovuz"u dueli gərgin mübarizə şəraitində keçərək birincilərin minimal hesablı qələbəsiylə yekunlaşıb.
Üçüncü yer uğrunda görüş də gərgin alınıb. Belə ki, əsas vaxt qolsuz yekunlaşıb. Təyin olunan əlavə 15 dəqiqədə Migəçevir təmsilçisi 1 qol vuraraq qalib olub. Tovuzluların görüşdə penalti zərbəsi dirəkdən döndüyü də vurğulayaq.
"Lokomotiv" fiinaldakı rəqibi - həmşəhərliləri də darmadağından qaça bilməyib - 4:0.
Xatirə turnirindən qaliblər diplom və hədiyyələrlə təltif olunub. "Lokomotiv"ə Kuboku turniri təşkilatçıların "Kəpəz Futbol Veteranları" İctimai Birliyinin Tofiq Məmmədov təqdim edib. Bu qurumun adından Gəncə şəhər "Şəhid Anaları" İB-in sədri Brilliant Əsgərovaya, turnirin keçirilməsinə maddi dəstək göstərən iş adamı Çapay Məmmədova Təşəkkürnamə təqdim olunub. Gəncə şəhər UGİM-in direktoru, "Şöhrət" Ordenli, Paralmiya çempionu Ramil Qasımov diplomla təltif olunub. "Kəpəz" Futbol Veteranları" turnirdə iştirakçı komandalara, fəxri qonaqlara, valideynlərə minnətdarlığını bildirib.
