Cari mövsümdə MOİK-in futbolçuları 2-ci dəfə danışılmış oyunlara görə AFFA İntizam Komitəsi tərəfindən cəzalandırıldı. Belə ki, Fərmayıl Əliyevlə Emin Mehtiyev bu ilin yanvarında ömürlük futboldan kənarlaşdırılıblar, I Divizionda çıxış edən Kamil Hüseynov, İlham Allahverdiyev, Rüstəm Rüstəmov, Veysov Elşən "ordu klubu"nun sabiq üzvü Qabil Sabirli, MOİK-in formasını geyinmiş, hazırda “Araz Naxçıvan”ın qapıçısı olan Fərman Bayramova danışılmış oyunlar barədə məlumatı olub, müvafiq orqanlara məlumat vermədiyinə görə 2 il müddətinə (1 il 6 ay şərti olmaqla) futbol ilə əlaqədar hər hansı fəaliyyətlə məşğul olmağına qadağa qoyulub. Adları çəkilən futbolçular 6 aydan sonra futbol fəaliyyəti ilə məşğul ola bilərlər.
Əsas şübhəli matç isə "hərbçilər"in bu mövsüm Ölkə Kubokunun 1/8 final mərhələsində "Səbail"ə Binə qəsəbə stadionunda 0:4 hesablı uduzduğu matçdı. Fərman, Fərmayıl, Kamil, İlham bu görüşdə 90 dəqiqə meydanda olublar. Emin də start heyətdə meydana çıxsa da, artıq 35-ci dəqiqədə əvəzlənib. Qabil sonadək ehtiyatda olubsa, Elşənin adı ümumiyyətlə, protokola daxil edilməyib. Həmin vaxt MOİK-in baş məşqçisi olmuş Şəhriyar Məmmədovla həmin oyunla, AFFA-nın qərarıyla bağlı söhbətləşdik.
- Qərarı necə qarşıladınız?
- Qərarla mətbuatdan tanış oldum və çox təəssüf edirəm ki, belə bir hadisə baş verib. Pis qarşılayıram baş verənləri. Ayıb olsun onlara ki, belə şeyləri biliblər, məlumat verməyiblər. Bu, komandaya qarşı hörmətsizlikdi. Amma mənim o haqda məlumatım olmayıb. Olsaydı, ən azından önləyici tədbir görərdim.
- Mehtiyevi artıq ilk hissədə əvəzləməsiniz. Səbəb nə idi?
- Oyunda 1-2 artıq hərəkət etməyi. Yenə də gözləmədiyim bir şey idi danışılmış oyunda iştirakı. İlk 10 dəqiqədə 2-3 dəfə Eminə irad bildirdim meydanda elədiyi hərəkətlərlə bağlı. Bunları "ustanovka"da tapşırmamışamsa, niyə uşaqları buna təhrik edirsən? Axı, o deyil o tapşırıq ki, ikinci zonada "uşaqları pressinqə təhrik etmək. Yadına saldım ki, nəyi tapşırmışam. Gördüm ki, tapşırığımı eləmir, erkən əvəzlədim.
- Maraqlıdı, sizə cavabı nə oldu meydanda etdikləriylə bağlı?
- Bu idi - onu göstərmək istəyirəm ki, Premyer Liqa komandası olsanız da, sizdən qorxmuruq, layiqli müqavimət göstəririk. Mən də dedim ki, həm sənə, həm bütün futbolçulara nə tapşırmışam, onu eləyin. Kənara çxımayın, başqa şeylər lazım deyil! Çünki "Səbail"i lazımınca təhlil edərək, ona qarşı necə oynamaq lazım olduğunu planlaşdırmışdım, bunları futbolçulara da çatdırmışdım.
- Komandanızın buraxdığı qolları xatırlayaq. Şübhəniz yox idi futbolçularınıza?
- Şübhə yaratmadı. Yaratsaydı, biz də lazımı tədbirləri görə bilərdik. Bilsəydim, şübhələnsəydim, bambaşqa tədbirlər görərdim, ən azından onları oynatmayardım. Mehdiyevdən də gedişlərinə görə şübhələnməmişəm, sadəcə, bunu özbaşınılıq kimi dəyərləndirmişəm.
- Fərmayıldan da şübhələnmədiniz?
- Yox, ümumiyyətlə, heç kimdən şübhələnməmişəm. Fərmayıl da ən etibar etdiyim uşaqlardan biri olub. Onu komandanın kapitanı seçmişdim. O qədər güvənirdim Əliyevə, buna görə belə seçim etdim. Bilirsiniz, araşdırmanın detallarını dəqiq bilmirəm. Qərada göstəriblər ki, xəbərləri olub, xəbər verməyiblər. Bunun özü də insanı məsuliyyətdən kənarlaşdırmır. Məlumatım olsaydı, bir tədbir görərdim.
- Bilsəydiniz lazımı orqanlara məlumat verərdiniz?
- Əlbəttə. Niyə verməyim ki?! Qanun hamı üçündü - istər baş məşqçi, istər futbolçu olsun. Hamımız qanun qarşısında cavabdehik.
- Komanda bir ailədi, siz də onun başçısı. Belə bir xoşagəlməz şeylər olur, heç nədən xəbəriniz olmur. İndi necə hisslər keçirirsiniz?
- İndi sizinlə danışıram və narahatam ki, belə bir şeylər olub. Deyilənə görə, işin başında Emin olub. İki mövsüm işləmişəm MOİK-də və heç kimlə ədavətim olmayıb. Sadəcə, Emini heyət salmaq istəməmişəm. Bu da özbaşınalıqlarına görədi. Dəqiq bilmirəm, yəqin, onun təklifi olub uşaqlara. Araşdırma müddətində komandada olsaydım, ən azından sorğu-suallarlarla, söhbətlərlə nələrisə araşdırardım. Amma kənardayam deyə heç nə edə bilmirəm. Məncə, bu, bir mənbədən qaynaqlanıb - Emin Mehtiyevdən, yeganə səbəbkar odu. Açığı, onu uzaqlaşdırmaq istəmişəm bundan öncə də komandadan. Bu haqda bir neçə nəfərlə də məsləhət eləmişəm ki, bu futbolçu mənə lazım deyil, qalması effekt vermir. Baş məşqçi mənəmsə, qərarları mən verirəm ki, bu futbolçu komandadan uzaq olsa, daha yaxşıdı, məsləhətlidi. Dedim ki, konkret Mehtiyevə etibar edə bilmirəm. Amma bilsəydim belə şeylə məşğul olur, imkan verməzdim meydanda olmasına. Məşqlərdə öz bildiklərini edirdi. Məşqlərdə, ikitərəfli oyunlarda ona dəfələrlə xəbərdarlıq edirdim.
- Bəs, niyə çıxarmadınız komandadan Emini?
- Mənə dedilər ki, müqaviləsi var.
- Nə olsun var? Lazımdırsa, xitam vermək olar....
- Bilirəm, başa düşürəm. Dedilər ki, milli oyunçusudu.
- Nə milli?
- Çimərlik futbolu millisi üzvü olduğunu əsas gətirdilər. Baxmayın, milli adı olduğuna görə bir az sayğımız da artır futbolçulara. Bu, tək mənə yox, bütün məşqçilərə aiddi. Elman Sultanovla komandanı götürmüşük - o, köməkçim olub, mən baş məşqçi. İnanıram ki, Elman Sultanov da bilsəydi, kəskin qarşılayardı, reaksiya verərdi.
- MOİK-dən niyə getdiniz?
- Onu deyim ki, həmin kubok matçının getməyimlə heç bir aiddiyyatı yoxdu. Çünki bundan sonra 4 matç keçirmişəm - 3 qələbə, 1 məğlubiyyət. "Neftçi-2" ilə görüşdən sonra ayrılmışam MOİK-dən. Bəzi tələblər vardı ki, komandanın bunun qarşılaması üst-üstə düşmürdü deyə yollarımızı ayırdıq. Onu da deyim ki, mən MOİK-ə gələndə əvvəlki heyət idi. Bir neçə transfer elədik imkan daxilində. Müqaviləsi bitənlərin yerinə 2-3 nəfəri gətirə bildim. Cəzalanan futbolçular məndən öncə oynamışlar idi. Mənimlə gələn uşaqlarda Allaha şükür, heç bir problem çıxmadı.
MEHMAN SÜLEYMANOV
