27 yaşlı kişi İngiltərədə biletsiz futbol matçına girməkdə ittiham olunan ilk şəxs olacaq. Sport24.az BBC-yə istinadən xəbər verir ki, hadisə "Uembli"də, "Arsenal" və "Mançester Siti" (2-0) arasında keçirilən Liqa Kubokunun finalı zamanı baş verib.
Yeni qanun martın 22-də, matçın bitməsindən bir neçə saat əvvəl qüvvəyə minib. Skotland Yard-ın məlumatına görə, Oldhemdən olan 27 yaşlı Benjamin Beyli iddia edilən cinayətlə əlaqədar mayın 1-i hakim qarşısına çıxacaq.
Qeyd edək ki, yeni qanun, 2021-ci ilin iyulunda, "Uembli"də Avropa çempionatının finalında İngiltərə və İtaliya arasında keçirilən oyunda minlərlə azarkeşin stadiona zorla girməsi nəticəsində baş verən ciddi iğtişaşlardan sonra tətbiq edilib. Yeni qayda, bileti olmayan azarkeşlərin etibarlı bilet sahiblərini turniketlərdən yaxından izləməsinin qarşısını almaq məqsədi daşıyır.
