"Deportivo" və İspaniya millisinin məşhur keçmiş hücumçusu Dieqo Tristan rəsmi olaraq "Cordoba"nın ikinci komandasına rəhbərlik etməyə başlayıb. Sport24.az xəbər verir ki, bu barədə klubun rəsmi saytı məlumat paylaşıb.
Klub rəhbərliyi komandanın nəticələrini yaxşılaşdırmaq üçün 50 yaşlı meneceri mövsümün son oyunları üçün təyin etmək qərarına gəlib.
Tristan "Deportivo"dakı çıxışları ilə (2000-2006) yadda qalıb. O, 2001/02 mövsümündə La Liqanın ən çox qol vuran oyunçusu olub.
Tristan həmçinin "Malyorka", "Livorno", "Vest Hem" və "Kadis"də də oynayıb. Hücumçu İspaniya millisində 15 oyun keçirib.
Qeyd edək ki, ötənlərin məşhur hücumçusu məşqçilik karyerası ərzində "Cordoba"nın 16 yaşadək futbolçulardan ibarət komandasını çalışdırıb və klubun akademiyasında da işləyib. O, həmçinin "Atletiko Alqabeno" və "İnter Sevilya"nın baş məşqçisi olub.
