"Qarabağ" çempionatın lideridi  və gözlənilən qələbə qazandı. "Şamaxı" məğlub olmasına baxmayaraq, özünəməxsus şəkildə oyun nümayiş etdi. Yəni liderə təslim olmadı, müqavimət göstərdi". Bu fikirləri Sport24.az-a açıqlamasında Misli Premyer Liqasında cari mövsümün iştirakçılarından olmuş baş məşqçi Yaşar Vahabzadə deyib.

"Kəpəz"dən IV turda istefa verərək ayrılan 63 yaşlı mütəxəssis son turu dəyərləndirərək  "Qəbələ" - "Sabah" oyununda qırmızı vərəqəyə qədər başabaş mübarizə getdiyini vurğulayıb: "Demək olar ki, həmin epizoda qədər açıq-aşkar üstün olan tərəf yox idi. "Qəbələ" azlıqda qaldıqdan sonra "Sabah"ın üstünlüyü görünürdü. Təbii ki, bu məqamda öz nəticəsini göstərdi və komanda 3 xal qazandı".

Vahabzadənin fikrincə, "Sumqayıt" "Turan Tovuz"la oyunda əzmkar qələbə qazanıb: "Bu qələbə onlara hava-su kimi lazım idi. Çünki çoxdandı qələbə qazanmırdılar".

Həmsöhbətimizin sözlərinə görə, turun mərkəzi görüşü olan "Neftçi" - "Zirə" matçı maraqlı keçib: ""Zirə"nin öz oyun fəlsəfəsi var. Hər iki tərəfin qol imkanları oldu. Bir qol oyunu həll etdi. "Kəpəz" və "Səbail" arasındakı oyun da maraqlı keçdi. Hər iki komanda turnir cədvəlinin sonuncu pilləsində olduğu üçün rəqabət güclü idi. "Kəpəz"də son nöqtə qoyulmur. Qol imkanları da oldu. "Səbail" də çoxdandı qələbə qazanmırdı. Onlar da qələbəyə ac idilər. Təbii ki, sonuncu pillədə olmaq futbolçulara psixoloji təsir edir. Hər iki tərəfin də qol imkanları oldu. "Səbail" isə şansı dəyərləndirdi və qələbə qazandı. Amma "Kəpəz"in oyununu bəyəndim. Komanda pis təsir bağışlamadı. Ancaq bu iki komandanın hazırkı mövqeləri elədir ki, baxımlı oyun göstərməkdənsə, xal ehtiyatı toplayıb yuxarı pillələrə qalxa bilərlər".

 

 

KAMAL RZA