"Kadinin "Qarabağ"da çempionatda ilk qolunu mənim vaxtımda "Səbail"ə vurmasını sizdən eşidirəm, maraqlı faktdı. Bu futbolçu haqda yalnız müsbət fikir bildirmək lazımdı. Hər birimiz bilirik ki, həm Avropa arenasında "Qarabağ" üçün vacib qollar vurdu, yaxşı oyunlar keçirdi, həm də daxili arenada". Bu fikirləri Sport24.az-a açıqlamasında "Səbail"in sabiq baş məşqçisi Aftandil Hacıyev deyib.
Maraqlıdı ki, "Qarabağ"ı hazırkı qış fasiləsində "Krasnodar"a dəyişən braziliyalı yarımmüdafiəçi Kadi Borges "Qarabağ"ın Premyer Liqamıda ilk qolunu məhz "dənizçilər"ə vurub - 1:3. Özü də ağdamlılar ondan bu yana, artıq 1 ildən çoxdu çempionatda məğlubiyyət nə olduğunu bilmir.
Hacıyevin sözlərinə görə, Kadinin "Qarabağ"dan gedişinə iki prizmadan yanaşmaq lazımdı: "Birincisi, futbolçunun öz tərəfindən baxsaq, belə şans, imkanlar hər vaxt ələ düşmür. Burda təbii ki, "Krasnodar"ın "Qarabağ"dan daha böyük klub olmağından getmir. Hər kəs bilir ki, futbolda nə qədər futbolu düşünsək də, oyunçular maliyyə tərəfini daha ön plana çəkməli olur. Yəni, Kadinin belə təklifdən imtina etməyi doğru olmazdı. İkincisi də "Qarabağ" bu izdivacdan yaxşı gəlir əldə edir. Düşünürəm ki, nə qədər desək də Kadinin gedişi "Qarabağ" üçün itkidi, hər iki tərəf üçün bu saziş uğurlu bir qərar oldu. Məncə, "Qarabağ"ın yaxşı gəlir əldə edərək, 2-3 daha yaxşı futbolçu almaq ehtimalı var. Nəzərə alaq ki, Kadi "Qarabağ"a çox aşağı qiymətə transfer olunmuşdu və indi onu satış məbləğinə daha keyfiyyətli futbolçular almaq olar. Təbii ki, "Qarabağ"ın iddialarına görə. Sadəcə, yeni klubunun "Krasnodar" olmasına görə tərəddüd edirəm ki, Rusiya çempionatında həmin Kadini görə biləcəyik, ya yox. Çünki fərqli ölkə, fərqli çempionat, fərqli üslubda oynayan komandalardı. Amma bütün hallarda Rusiya çempionatında braziliyalı futbolçuların artıq söz etməsindən xəbərimiz var. Bu sırada "Krasnodar" da var".
42 yaşlı mütəxəssis hesab edir ki, bütün hallarda Kadinin uğurlu çıxış etməsi skautlar tərəfindən çempionatımızın diqqət mərkəzinə düşməsinə gətib çıxara bilər: "Rusiya klubları da tez-tez bizə müraciət etmiş olar, belə hallarda Azərbaycan çempionatındakı yerli futbolçulara da maraq arta billər. Təbii ki, Kadinin "Krasnodar"da çıxışı uğurlu alınarsa".
Belə fikir də var ki, "Qarabağ"dan hansı futbolçu getsə də, bu, ciddi təsir etmir. Çünki 15-ci ildir baş məşqçisi olan Qurban Qurbanovun qurduğu sistem var və burda fərdlər əsas deyil. Hacıyev də bununla razılaşır: "Həqiqətən elədi ki, seçim edəndə görürsən məşqçi heyətləri öz üslublarına uyğun futbolçuları götürürlər. "Qarabağ" da Kadinin üslubuna uyğun transfer etmək istəyəcək. Ən azı sol ayaq olacağını düşünürəm. Çünki "Qarabağ"da artıq solaxay vinger yoxdu. Hayme Romero vardı, o da getdi. Hal-hazırda "Qarabağ"da solaxay vingerə ehtiyac var və bunun reallaşması gözlənilir. Bundan başqa əldə olunan məbləğə başqa vacib mövqelərə də futbolçular alaraq boşluqları doldura bilərlər. Məncə, "Qarabağ"a gücünə daha çox güc qata bilən futbolçular cəlb olunacaq".
MEHMAN SÜLEYMANOV
