"Qəbələ" "Neftçi"ylə finalda kapitanı Asif Məmmədovun xidmətindən məhrum idi. "Bakcell Arena"dakı həlledici matçda cəzalı olan 37 yaşlı yarımmüdafiəçinin sonradan zədə üzündən mövsümü tez qapadığı bəlli oldu. Mükafatlandırma mərasiminə ayağı gipsdə gələn Asif Kuboku başı üzərinə qaldırandan sonra Sport24.az-ın suallarını cavablandırıb. 

- Karyeranın qürub çağında ağır zədə alaraq mövsümü erkən qapamalı oldun və əməliyyatdan sonra "Qəbələ"nin matçlarına ayağın gipsdə gəlirsən. Kuboku da kapitan başın üzərinə belə vəziyyətdə qaldırdın. Nə hissləri keçirdin o anda?

- Vallah, çox həyəcanlı hisslərdi. Bunlar sözlə ifadə eləmək çox çətindi, həddindən artıq çətindi. Amma oyunun ilk dəqiqələrində bir az ümidim artdı ki, yekun bizim üçün uğurlu olacaq. Baxmayaraq ki, "Neftçi" kimi komandaya qarşı, onun meydanında oynayırdıq. 

- Nəyə görə ümidin artdı?

- Bilirəm ki, komandam belə start götürəndə hesab necə ola bilər. Hətta oyun əlavə vaxta gedəndə hiss edirdim ki, qalib gələcəyik. Demək olar 1-ci dəqiqədən hiss edirdim ki, Kubok bizimdi. Sonda belə də oldu və bu sevinci mənə yaşatdılar. Uşaqlara da təşəkkür edirəm ki, belə bir yaşda bu Kuboku qaldırmaq mənə nəsib oldu. 

- Ümumiyyətlə, final oyunu kənardan necə görünürdü?

- Çox gözəl futbol oynayırdıq. Yəqin, siz də mənimlə razılaşarsınız. Çox super futbol oynadıq. Sadəcə, kənardan baxmaq meydanda olmaqdan çətindi. 

- Cəzalı olmasaydın, yəqin, ehtiyatda oturardın. Baş məşqçiniz Elmar Baxşıyev son turda bunu etmişdi...

- Bəli, cəzalı olmasaydın, yüz faiz ehtiyatda oturacaqdım. Bu dəfə tribunada idim. Belə çətinlikləri də aşacağıq. 

- "Bakcell Arena"da oynamağa toxunaq. Bu stadionda avrokuboklarda yaxşı oynamısınız, Avroliqanın qrupunda çıxış etmisiniz...

- Bəli, bizə düşərli stadiondu. Ona görə final "Bakcell Arena"ya düşəndə, buna sevindik. 

- İstənilən halda, rəqibin stadionu idi. Buna görə narahat deyildiniz?

- Heç bir narahatlığımız yox idi. Əksinə, rahat idik, çünki bizə uğur gətirən stadiondu.

- "Neftçi" daha çox gərginlikdə idi. Çünki mövsümü titulla başa vurmaq təzyiqi var idi. Bu amil işinizi bir qədər asanlaşdırmışdı?

- 4-cü yeri tutmasaydıq, bəlkə bizdə "Neftçi"də daha çox gərginlik ola bilərdi, çox pis oynaya bilərdik. Avropaya artıq çıxmışdıq və ona görə rahat idik. Qarşımıza əvvəldən nə tapşırıq qoyulmuşdu, onun öhdəsindən finaladək gəlmişdik. Bu üzdən oyuna rahat çıxmışdıq və udsaq da, uduzsaq da, yəqin, bir söz deyən olmayacaqdı. Çünki kiçik bir büdcəylə, komandayla böyük işimizi görmüşük. 

- İndi "Qəbələ" üçün ən aktual mövzu budu ki, bu heyəti qoruyub saxlaya biləcəkmi? Kapitan bu haqda nəyə ümidlidi? Bu Kubok sizə necə kömək edə bilər?

- İnşallah, ümid edirəm ki, Kubokdan sonra köhnə "Qəbələ" geri qayıda biləcək.

 

 

 

MEHMAN SÜLEYMANOV