Fransa dünyanın ən güclü biatlon ölkələrindən biri olsa da, son illər Juliya Simondan başqa bu ölkəyə uğur qazandıran idmançı demək olar ki yoxdu. Sport24.az xəbər verir ki, nüfuzlu turnirlərdə fransalı biatlonçular arzulanan nəticələri qazana bilmir.

Artıq vəziyyətin düzəlmədiyini görən Fransa millisinin məşqçiləri Vensan Vittoz və Patrik Favr istefa vermək qərarına gəlib. Onlar mətbuata açıqlama verərkən, uğursuzluğa görə biatlonçuları günahlandırıb. Əvvəlcə Vensan Vittozu dinləyək: “Bu qərarı qəbul etmək məcburiyyətində qaldıq. Çünki idmançılarımızla dil tapa bilmirik. Biz mövsümün yekunlarını apardıq, səhvlərimizi üzə çıxardıq, öz fikirlərimizi dedik. Biatlonçularımız da öz mövqelərini ortaya qoydu. Görünən odur ki, onlar artıq bizi dinləmir. Belə baxanda, fəaliyyətimizi davam etdirə bilərdik, amma aramızda rabitə itibsə, artıq işləmətə dəyməz”.

Favr isə öz növbəsində bunları söyləyib: “Onlar artıq taktiki göstərişlərimizdən bezib, məşq prosesimizi də bəyənmirlər. Mənə elə gəlir ki, daha effektli ola bilmirik. Vəziiyyətdən çıxış yolu tapmaq üçün ideyalarımız var idi, amma onlar da işə yaramadı. Əvvəlki kimi, tapşırıqlarımızı yerinə yetirmirlər”.

Xatırladaq ki, hazırda dünya kubokunda qadınların yarışında Juliya Simon lider mövqeyində qərarlaşsa da, kişilər arasında ən yaxşı göstərici 10-cu yeri tutan Fabyen Kloda məxsusdur.