Bugündən Azərbaycan Premyer Liqasında VAR sisteminin tətbiqinə start verildi. Xeyli müddətdir ki, mövzu ətrafında aparılan müzakirələrin son nöqtəsi “Kəpəz" - “Zirə” matçında qoyuldu.
Məsələnin daha bir maraqlı tərəfi bundadır ki, hadisəyə FİFA-nın rəsmi saytı da biganə qalmayıb. Aydın məsələdir ki, VAR sisteminin tətbiqinə Azərbaycan ilk ölkə deyil start verib. Uzun illərdir durmadan təkrar edirik ki, istənilən idman sahəsinin ali idarəedici qurumunda həmyerlimizin təmsil olunması olduqca önəmli məqamdır. Azərbaycan 30 illik tarixində nəhayət, ilk dəfə FİFA-da Elxan Məmmədovun timsalında təmsil olunmağa başlayıb. Ölkə adına bu yazının faydası barədə əlavə şərhə ehtiyac yoxdu və bu, hələ ki ilk cücərtilərdi.
FİFA-nın rəsmi saytıdakı materialı təqdim edirik:
"Bu mövsüm Azərbaycan Premyer Liqasında VAR texnologiyası tətbiq olunacaq 30-dan çox tam sınaq oyunu uğurla keçirilib. Hakimlər Türkiyə Futbol Federasiyası ilə əməkdaşlıq çərçivəsində təlim keçiblər. Avqustun 5-də start götürəcək Azərbaycan Premyer Liqasının yeni mövsümü öncəsi FIFA Forward proqramı yeni texnologiyanın tətbiqini maliyyələşdirib. Video köməkçi hakimlər (VAR) ilk dəfə 2022/23 mövsümündə, eləcə də Azərbaycan Kubokunun oyunları üçün işləyəcək. FİFA-nın VAR layihəsinə maliyyə töhfəsi Forward 2.0 dövründən 479,173 ABŞ dolları təşkil edir. Azərbaycan Futbol Federasiyaları Assosiasiyasının (AFFA) matçın mərkəzində üç Video Əməliyyat otağı (VAR) və əlavə tək mobil VAR olacaq. Bu, gələcəkdə daha da genişləndirmək imkanı ilə VAR-ı eyni vaxtda dörd matçda tətbiq etməyə imkan verəcək.
Müxtəlif sistemlərlə tanış olmaq üçün müxtəlif ölkələrə səfər etdikdən sonra AFFA-nın VAR layihə komandası Bakıda yerləşən stadionlar üçün mərkəzləşdirilmiş sistemə və regionlar üçün mərkəzləşdirilməmiş sistemə üstünlük verib. Bu əlamətdar hadisəyə tam hazır olmaq üçün Azərbaycan Premyer Liqasının hakimləri Türkiyə Futbol Federasiyası ilə əməkdaşlıq çərçivəsində üç seminar keçirərək, texnologiyanın həm nəzəri, həm də praktiki elementləri üzrə təlim keçiblər. Ölkənin bütün müvafiq stadionlarında 30-dan çox tam sınaq oyunu da keçirilib.
Hazırlığın son mərhələsinin bir hissəsi olaraq, FİFA-nın Texnologiya və İnnovasiyalar Departamentinin nümayəndəsi VAR texnologiya həllinin qiymətləndirilməsi üçün iyulun ortalarında sınaq zamanı layihə komandasına qoşulub.
AFFA-nın baş katibi Sərxan Hacıyevnin sözlərinə görə, ölkəmizdə VAR-ın tətbiqi müəyyən çətinliklərlə üzləşib: "Çünki bu proses COVID-19 pandemiyası ilə üst-üstə düşdü. Azərbaycan futbolu böyük VAR ailəsinin üzvü ola bilər”.
Premyer Liqaya yenicə qayıdan və Azərbaycanın ikinci böyük şəhəri olan Gəncənin təmsilçisi “Kəpəz” bu mövsüm yeni 10 komanda formatında ilk turda “Zirə” ilə qarşılaşacaq. Bütün komandalar üçün problem "Qarabağ"ın hegemonluğu olacaq. Belə ki, paytaxtda məskunlaşan bu Ağdam klubu son 9 mövsümün 8-də çempionatın qalibi olub və hələ 2017/18 mövsümündə UEFA Çempionlar Liqasının qrup mərhələsinə yüksələn ilk Azərbaycan komandası olub.
FIFA Forward maliyyələşdirməsi və UEFA-nın Het-Trik proqramı vasitəsilə Azərbaycanda futbol artıq Tovuzda təlim mərkəzinin tikintisi kimi layihələrlə gücləndirilib. Həmin obyektə tam təchiz olunmuş müasir stadion, 4 mini-meydança (1 qapalı meydança daxil olmaqla), akademiya otaqları və restoranlar daxildir. Kompleks hazırda regionda əsas futbol mərkəzi kimi fəaliyyət göstərərək, gənclərin və peşəkar futbolçuların yetişməsinə şərait yaradır".
