"Əlbəttə, son həftələrdə futbolçularımız gərgin qrafikdə olurdular. Hər həftə belə məşq rejimi idi. Futbolçuların bu cür rahat oyuna çıxması da lazımdı. Çünki özlərini daha yaxşı hiss eləmələri, artırmaları üçün ehtiyacımız vardı". Bu fikirləri Sport24.az-ın Tovuza ezam olunmuş əməkdaşına açıqlamasında "Turan Tovuz"un baş məşqçisi Ayxan Abbasov deyib.
I Divizionda çıxış edən ikinci komandalarıyla (7:2) yoxlama matçlarını faydasından danışan 42 yaşlı mütəxəssisin fikrincə, ümumən bu həftə onlar üçün ağır həftə oldu: "O mənada ki, ağır məşqlərimiz oldu. Bundan sora elə böyük vaxtımız yoxdu. Çünki bilirsiniz ki, Kubokda da varıq, sıx qrafikə girəcəyik. Ona görə fürsətdən istifadə edərək futbolçularımızın fiziki durumlarını daha yaxşılaşdırmaq üçün bu həftə gündə həm 2, həm də 1 məşqimiz oldu. Buna yekun olaraq oyuna çevirmək istədik. Bu matçda bəzi futbolçularımızı əvəzedici heyətdə bizə qarşı oynatdıq ki, bir az da rəqabət olsun. Həm də gənclərimizi oyunda görmək istəyirdik. Əvəzedicilərdə əsas komandaya qarşı oynamaq onların inkişafı üçün də önəmli olur. Bu zaman özlərini yaxşı tərəfdən göstərmək istəyirlər. Normal oldu, futbolçulara verdiyimiz yükü ala bildik".
Maraqlıdı, Abbasovun ikinci komandadan diqqətini çəkən konkret futbolçular oldumu?: "Var-var, orda yaxşı uşaqlarımız var. Həftəiçi bizimlə məşq edirdilər, vaxtımız olanda onları çağırırıq. Ümumən istəyirik digər komandalarımızı - əvəzedici, U-19-u diqqətdə saxlayaq. Hətta U-17 komandamızdan da futbolçu çağırmışdıq - Dinami Bağırovu. Bizimlə oldu, milliyə namizəddi. Belə futbolçularımızla daha sıx əlaqədəyik. Çünki bizi milli komandada təmsil etdiklərindən inkişafları önəmlidi. Oyunda da yaxşı göründülər. Onların da inkişafı üçün belə oyunlar vacibdi".
MEHMAN SÜLEYMANOV
