"Misli Premyer Liqasının 3-cü turunun əsas qarşılaşması, şübhəsiz ki, "Zirə" – "Neftçi" oyunu idi. Həm turnir cədvəlindəki mövqelərinə, həm də komandaların qarşılaşmaya qədərki çıxışlarına görə bu matça maraq böyük idi. Gözlənildiyi kimi, görüş kifayət qədər gərgin mübarizə şəraitinə keçdi. Hər iki komanda qələbə qazanmaq istəyində olsa da, meydanda daha intizamlı və planlı görünən tərəf "Zirə" idi". Bu sözləri Sport24.az-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov deyib.
Təcrübəli mütəxəssis Misli Premyer Liqasının 3-cü turunun oyunlarını dəyərləndirib:
"Bu qarşılaşma çempionluq uğrunda mübarizə apara biləcək komandaları mənim üçün bir daha müəyyənləşdirdi. Fikrimcə, bu mövsüm də əsas mübarizə "Qarabağ" və "Sabah" arasında gedəcək. Hər iki komandanın həm heyəti keyfiyyətli futbolçulardan qurulub, həm də oyun fəlsəfəsi baxımından digər rəqiblərdən müəyyən üstünlükləri var. Mövsümün əvvəlində nəticələr müxtəlif ola bilər, amma uzunmüddətli marafonda bu iki komandanın daha sabit çıxış edəcəyini düşünürəm. Təbii ki, "Sabah"la bağlı ayrıca məqam var. Komandanın Çempionlar Liqasındakı çıxışının çempionat oyunlarına necə təsir göstərəcəyini zamanla görəcəyik. Avrokuboklarda mübarizə aparmaq həm futbolçulardan fiziki, həm də psixoloji baxımdan böyük enerji tələb edir. Üstəlik, sıx oyun qrafiki məşq prosesinə və bərpa müddətinə də təsir göstərir. "Sabah"ın "Araz-Naxçıvan"ı minimal hesabla məğlub etdiyi qarşılaşmada bunun müəyyən əlamətlərini gördük. Komanda qələbə qazansa da, əvvəlki oyunlardakı enerjini və dominantlığı tam şəkildə ortaya qoya bilmədi. Əgər belə hallar mütəmadi xarakter alarsa, bu, Masazır təmsilçisinin üçün çempionat görüşlərində əlavə çətinliklər yarada bilər. Digər tərəfdən, mövsümün hələ yeni başladığını da nəzərə almaq lazımdır".
Təcrübəli mütəxəssis "Neftçi" və "Turan Tovuz" barədə də fikirlərini bölüşüb:
"İstət Bakı, İstərsə də Tovuz təmsilçisi barədə yekun fikir söyləmək üçün bir neçə turun nəticələrini gözləmək daha doğru olar. Ola bilər ki, bu komandalar hələ tam köklənməyiblər və yeni mövsümün ritmini tutmağa çalışırlar. Xüsusilə "ağ-qaralar" kimi böyük hədəfləri olan komanda üçün mövsümə istənilən səviyyədə başlamaq vacibdir. Çünki çempionatın gedişində itirilən xalların sonradan əvəzini çıxmaq heç də həmişə mümkün olmur. "Neftçi"nin çatışmazlıqları "Zirə" ilə oyunda kifayət qədər açıq şəkildə göründü. Komanda hücumda istədiyi təhlükəni yarada bilmədi, rəqibin müdafiə xəttini açmaqda çətinlik çəkdi. Qəsəbə təmsilçinin kompakt müdafiəsi qarşısında "Neftçi"nin hücumları bir çox hallarda sistemsiz və proqnozlaşdırılan təsir bağışladı. Xüsusilə belə oyunlarda rəqibin müdafiə blokunu hərəkətə gətirmək, cinahlardan daha effektiv istifadə etmək və hücumların tempini dəyişmək vacibdir. Flaqman isə bunları tam şəkildə həyata keçirə bilmədi. "Zirə"nin oyununa gəldikdə isə, qəsəbə təmsilçisi taktiki baxımdan düzgün qarşılaşma keçirdi. Komanda öndə qarşılamaya və rəqibə yüksək pressinq tətbiq etməyə çalışmaq əvəzinə, bir qədər geridə yerləşərək daha kompakt oynadı. Bununla həm "Neftçi"nin hücumları zamanı boşluq vermədi, həm də topu qazandıqdan sonra sürətli hücumlar üçün imkan yaratdı".
Qeyd edək ki, turun oyunlarında "Qarabağ" "Sumqayıt"ı, (1:0) "Sabah" "Araz-Naxçıvan"ı, (1:0) "İmişli" "Şəfa"nı (1:0), "Kəpəz" "Turan Tovuz"u (1:0), "Zirə" "Neftçi"ni (1:0) üstələyib, "Qəbələ" ilə "sülh" bağlayıb - 0:0.
