"Azərbaycan şahmatının yükünü çiyinlərimdə daşımağa hazıram". Sport24.az-ın Qəbələyə ezam olunmuş əməkdaşı xəbər verir ki, bunu jurnalistlərə açıqlamasında "Vüqar Həşimov Memorial-2023" superturnirinə qatılan Azərbaycan şahmatçısı Aydın Süleymanlı deyib.
Bu gün startı verilən yarışın ilk 3 turunda 3 xal toplayan gənc şahmatçı birinci turda Rauf Məmmədova məğlub olmasının səbəbini izah edib: "Ötən il də bu turnirdə Raufla üç dəfə qarşılaşmışdıq. Onun ikisində bərabərə qalmışdıq, birində isə rəqibim qalib gəlmişdi. Məmmədovla bugünkü görüşün gedişində üstün idim. Ancaq vaxt azlığı problem yaratdı. Rauf da yaxşı oynadı və qalib gəldi".
18 yaşlı şahmatçı qarşıdakı duellər barədə düşündüyünü söyləyib: "Qarşıdakı 3 turda bugünkündən daha çox xal toplamalıyam. Təkcə həmin turları deyil, ümumiyyətlə, yarışı fikirləşirəm".
Süleymanlı Azərbaycanın ən yaxşı şahmatçıları ilə bir turnirdə çıxış etməyin onun üçün xoş hiss olduğunu vurğulayıb: "Onlardan ikisi ilə bu gün qarşılaşdım. Uşaqlıqda oyunlarına baxdığım qrossmeysterlərlə qarşılaşmaq gözəl hissdir. Onların oyun üslubları daha çox inkişaf edib. Mən hələ o mərhələyə çatmamışam".
18 yaşlı qrossmeyster ilk məşqçiləri barədə də söz açıb: "Hər biri mənim üçün əzizdir. İlk məşqçim Əhməd müəllim olub. Daha sonra isə əməkdar məşqçi Xalid Atababayevin tələbəsi oldum, onun rəhbərliyi altında inkişaf etdim. Ümumiyyətlə, karyeram ərzində yolum kəsişən və mənə dərs keçən hər bir mütəxəssisə minnətdaram".
Qeyd edək ki, ilk gündə Rauf Məmmədova məğlub olan Aydın Süleymanlı Teymur Rəcəbovla heç-heçə edib, niderlandlı Yorden Van Forestə qalib gəlib.
CEYHUN ƏLİYEV
