Bu gün "Qarabağ" Avropa Konfrans Liqasının pley-off mərhələsi üçün iştirak ərizəsini təqdim edəcək. Acı reallıq budur ki, Ağdam təmsilçisi sutka tamamlananadək sıradan çıxmış Şahruddin Məhəmmədəliyevə əvəzləyici tapmasa, Luka Quqeşaşvili ilə Amin Ramazanovun, habelə ikinci komandadan daha bir gənc əlcək sahibinin ümidinə qalmalı olacaq. Ancaq Sport24 az-ın apardığı bəzi araşdırmalar sayəsində olduqca maraqlı bir gedişlə vəziyyətdən çıxış yolunu tapdıq.
Qaydalara əsasən Konfrans Liqasının iştirakçıları bu gecə yarısınadək heyəti UEFA-ya təqdim etməlidi. Azərbaycan çempionu da bunu etməlidi və edəcək də. Lakin...
İştirak ərizəsində 3 qapıçıdan biri olaraq Şahruddini göstərməklə, Qurban Qurbanov @ CO qızıl dəyərində vaxt udmuş olacaq. Çünki qaydalara əsasən hər komandada 3 əlcək sahibinin sifariş olması şərtdir. Əgər qapıçılardan hər hansısa birinin zədə səbəbindən iştirak edə bilməyəcəyi dəqiqləşərsə, klub oyunun başlamasına 24 saat qalanadək yeni qolkiper sifariş edə bilər! Bu isə o deməkdir ki, "süvarilər" Belçika "Gent"i ilə fevralın 16-da baş tutacaq oyuna 24 saat qalanadək yeni qapıçı sifariş edə bilər!
Doğrudu, burda belə bir qayda qüvvəyə minir ki, Şahruddin cari avrokubok mövsümündə iştirak etməməklə yanaşı, yaxın 2 ayda ölkədaxili turnirlərdə də forma geyinə bilməz. Ancaq təcrübəli əlcək sahibinin durumu onsuz da elədir ki, ən tez aprel ayında meydana çıxa bilər. Göründüyü kimi, qapıçı ilə əlaqədar vəziyyət ürəkaçan olmasa da, panikaya da düşmək üçün hələlik əsas yoxdu. Ümid edirik ki, "Qarabağ"ın qapıçı düyünü tezliklə müsbət həllini tapacaq və Belçika təmsilçisinin görüşdə yeni parlaq əlcək sahibini görəcəyik.
