Artıq 1 ildi ki, Bakıda yaşayır. Ölkəmizdə xeyli sayda əcnəbi mütəxəssis çalışıb. Bunların içində ən unudulmaz iz buraxan heç şübhəsiz ki, "Qəbələ"ni iki dəfə Avropa Liqasının qrupuna daşıyan Roman Qriqorçuk olub. İndi isə yeni sima parlamağa başlayıb. Söhbət "Sabah"ın baş məşqçisi Murad Musayevdən gedir. Rusiyalı mütəxəssislə söhbətimiz aylarla yubansa da, nəhayət ki, randevu baş tutdu. Çoxları onu ad və soyadına görə azərbaycanlı sanır. Əslində isə Musayevin kökü Özbəkistandandı. Elə qohumları da hazırda Buxarada yaşayır. Fikrimcə, söhbət səmimi alındı. İlk olaraq da Özbəkistanla hazırki əlaqələrdən başladıq.
"Sizin aş özbək aşından yüngüldü"
- Özbəkistanda son dəfə 2021-ci iyununda olmuşam. Bu, Azərbaycana gəlməmişdən bir az əvvəl idi.
- Yəqin, orda qohumlarınız qalıb...
- Bəli, Buxaradırlar. Mən də ora getmişdim. Bunadək isə SSRİ dövründə atamla birgə olmuşdum. Onda babam hələ sağ idi, 5-6 yaşım vardı. Bu dəfə isə ailəmlə birgə getmişdim. Babamın qəbrini ziyarət etdim, qohumlarımla görüşdüm. Çoxlu görməli yerləri gəzdik. Buxarada çox tarixi məkan var - məscidlər, mədrəsələr, Buxara xanının sarayı. Əlbəttə, adəti üzrə Şərqdə çox isti qarşılanma vardı. Buna görə yaddaqalan səfər idi. Ümid edirəm ki, yaxında onlar Bakıya bizə qonaq gələcəklər. Üstəlik, qardaşımın birinin səhhətində problem var. Ona Naftalan müalicəsi məsləhət görüblər. Bu sanatoriya ilə artıq maraqlanmışam. Yəqin, yaxında gələcəklər yanıma.
- Özbək plovu dadmısınız?
- (gülür) Əlbəttə!
- Onu Azərbaycan plovu ilə müqayisə etmək olar, yoxsa..?
- Fikrimcə, fərlqi iki yeməkdi. Şah plov deyirlər, axı o, köksüz, soğansızdı. Mənə görə tam ayrı daddadırlar. Sizin plov daha çox pəhrizlidi, o qədər yağ, piy yoxdu. Sizin aş daha yüngüldü.
"Azərbaycanlılarla bir az incə davranmaq lazımdı, onlar tənqidə görə...."
- Hələ ötən mövsümdən barənizdə geniş müzakirələr getməyə başladı. Eyni heyətlə son pillədə olan və çarəsiz görünən kollektivi xallar toplamağa necə öyrədə bildiniz?
- Yalnız bir şeyə inanıram - iş və nizam-intizam. Yeni gəldiyimdə tələblərimi, tələblərimizi aşıladım ki, sizə qarşı çox, hər xırdalığına kimi tələbkar olacağıq. Amma hər gün məşqdə bütün gücümüzü qoyacağıqsa, nizam-intizamlı olacağıqsınızsa - təkcə meydanda yox, həyatda da - nəticə mütləq gələcək. Çox vacib odur ki, futbolçular buna, bizim ideyalara inandılar. Bundan sonra da vəziyyət bir az yaxşılaşdı, addım-addım inkişaf etməyə başladıq.
- Azərbaycana, azərbaycanlılara adaptasiya olunmağa nə qədər vaxt tələb olundu?
- Əlbəttə ki, hər bir ölkədə, hər bir millətdə bir az özünəməxsus xüsusiyyətlər var. Amma istənilən halda, mən özüm də axı, Qafqazda yaşayıram. Bilirəm ki, Krasnodarda çoxlu azərbaycanlı var. Deyə bilmərəm ki, aramızda köklü fərq var. Yalnız bir şey diqqət çəkdi ki, rus futblçuya iradı kobud formada bildirirsənsə, deyəcək ki, "başa düşdüm" və qaçmağa davam edəcək. Azərbaycanlılarla isə bir az incə davranmaq lazımdı. Onlar tənqidə görə üzülə, inciyə bilərlər. Vacib olan budu ki, buterbrod düzəltməlisən - tərifləyəsən, tənqid edəsən, tərifəyəsən, tənqid edəsən, sonra yenə tərifləyəsən. Onda hər şey yaxşı olacaq.
-- Çəki artırdığınızı söyləmək olmur. Azərbaycan mətbəxinin kalorisinə necə qalib gələ bilirsiniz?
- Açığı, bir az kökəlmişəm. Özümü çox məhdudlaşdırıram. İstərdim ki, indikindən 3 kq az çəkim olsun. Çətindi, çox çətindi. Xüsusilə də restorana gedirsən, gözləyirsən sənə ət yeməyi gətirənədək qutab, dolma, müxtəlif salatlar gətirirlər. Nəticədə əsas yemək gələnədək artıq sən nə qədər qida yemiş olursan. Ət gətirəndə isə ondan da imtina edə bilmirsən. Buna görə Azərbaycan mətbəxiylə çox səliqəli, diqqətli davranıram (gülür). Mətbəxiniz çox dadlıdı. Hələ desertdəki paxlava, şəkərburanı demirəm. Şirniyyatları da çox sevirəm. Bu, mənim üçün böyük sınaqdı.
- Futbolçularımızın iştahasını da kəsə bilirsiniz?
- Bilrsiiz, komandamızdakı futbolçuları tərəziyə çıxarırıq. Artıq çəkidə olanlara cərimələrimiz tətbiq olunur. Futboçulara iradımız yoxdu, onlar çəkini gözləyirlər. Bax, belə özəlliklər var Azərbaycan mətbəxiylə bağlı. Özbəkistanda soruşdunuz, orda daha çox yağlıdı yeməklər. Orda da özünü formada saxlamaq çox çətindi. Amma idmançısansa, özünü gözləməli, qidanı məhdudlaşdırmalısan.
"Özümü belə aparmamalıyam, amma gördüklərimə reaksiya verməyə də bilmirəm"
- Xarakterinizdəki çılğınlıq Rusiyada da özünü göstərirdi, Azərbaycanda da bunun şahidi oluruq. Hakimləri bildik, bəs özünüz necə, soyuq başla hərəkətlərinizi təhlil etdikdə bir sıra epizodlarda aqressiv davranmağınızı qınayırsınız?
- Bəzi matçlarda hakimlik xoşuma gəlmir. Futbolda artıq çox şeyi görmüşəm, bu incəlikləri yaxşı başa düşürəm. Üç fol edirsənsə və üç sarı vərəqə alırsansa, sonra bu hakim gedib "Qarabağ" - "Neftçi" matçında sərtliklə bağlı bu qədər tempə imkan verirsə, "sarı"sız keçinirsə... Başa düşürəm ki, bunlar təsadüfi deyil. Yalnız çoxsaylı misallardan birini çəkirəm. Sadəcə, Rusiayada belədi ki, sənin komandanın udmağını istəmirlərsə, bunu daha səliqəli edirlər. Çox matç var ki, 50-50-yə olanda, qərarı xeyrinə vermirlər. Hətta 40-60-a. Sadəcə, səbəb olur ki, ya futbolçuna qırmızı vərəqə göstərirlər, ya qapına penalti verirlər. Azərbaycanda bəzi şeyləri çox açıq və kobud şəkildə edirlər. "Şamaxı"yla son matçımızda referi bizi cərimə folları ilə "boğdu", qərarları yalnız bir tərəfə idi. Əlbəttə, özümü belə aparmamalıyam, amma gördüklərimə reaksiya verməyə də bilmirəm. Bütün hakim qərarları əleyhimizə olsun və mən də sakit duraraq, "ok, davam edin", deyə bilmərəm axı...Başa düşürəm ki, hərəkətlərim doğru deyil. Axı hakimlər də "Sabah"a hörmət bəsləməlidi. Kimsə "Sabah"a kömək etsin - belə epizod göstərə bilməzsiniz. Yalnız "Kəpəz"lə son matçımızı göstərə bilərsiniz ki, orda bilinmirdi qapımıza qol var, ya yox. Başa düşün, həmin matçda artıq heç nəyə iddia etmirdik, artıq 2-ci idik. Hesab 2:0 xeyrimizədi, hər şey bizdə alınır. Hətta onda hakim səhv edibsə belə, bu, heç nə dəyişmir. Bir sıra həlledici matçlarda qərarlar əleyhimizə olub. Başa düşürəm ki, hərəkətlərimlə özümə pis edirəm - qırmızı vərəqə alıram, cərimələnirik, əsəbiləşirəm, gecə yata bilmirəm. Amma sakt də dura bilmirəm gördüklərimə. Hakimliyi yaxşılaşdırmaq lazımdı.
- "Texniki zona"da olmamağınız komandanıza pis təsir etmir?
- "Texniki zona"da olmadığım bütün matçlarda məncə, qalib gəlmişik. Hətta "Qarabağ"ı da məğlub etmişik.
- Belə çıxır ki, kənarda qalmağınız daha yaxşıdı?
- Yox, heç də yaxşı deyil. Axı, nəzərə alaq ki, oyunadək bütün həftəboyu komandayla məşq edirəm, lazımı taktikanı verirəm, bütün köməkçilərimlə əlaqədə oluram. Əksinə, mənə elə gəlir ki, uduzmaq, ədalətsizliyə dözmək istəmirəm - bütün bunlar futboçularıma ötürülür. Bəli, razılaşmışıq ki, futboçularımızın çox intizamsız davranışlara görə cərimələri var. Onu da razılaşmışıq ki, hakimliklə bağlı etirazımız olanda bunu biz ehtiyat oyuçular skamyasındakılar edirik, siz isə meydanda futbolla məşğul olun. Reaksiyanı mən, komandanın rəisi verməlidi. Siz isə lütfən futbol oynayın. Prinsipcə, bunu da görürük. Hakim necə idarəçilik edirsə-etsin, uşaqlar oynayırlar, vəssalam!
- Klub prezidenti ilə bu barədə söhbətimiz olurmu?
- Əlbəttə, olur. Hamı hər şeyi gözəl başa düşür ki, özümü niyə belə aparıram.
- Fikrimcə, hakimlər də bunu anlayırlar...
- Ümid edirəm ki, belədi. Başa düşürsünüzsə, baş verənlərə reaksiya verməmək olmur. Bunu etmirsənsə, deməli, bununla razılaşırsan və onlar da bu işi daha pis görəcəklər. Yəni, gördüklərimi hansısa formada ifadə etməliyəm, sizə açıq şəkildə deməliyəm ki, nə görürəm, nə hiss edirəm. Başqa cür vəziyyəti düzəldə bilməzsən. Susmağa başlasam, vəziyyət daha pis olacaq.
- Avrokuboklarda vərəqə almasanız, deməli, "günahkardı" verdikti üzərinizdən götürülməlidir. Bunu bacaracaqsınız?
- Yox, niyə ki? Sarı, qırmızı vərəqə alıramsa, əlbəttə, günahkaram. Bilirəm ki, televiziyada verilişlərin birində demisiniz ki, Murad Musayevi Rusiyada da meydandan qovublar. Əvvəl işlədiyim "Krasnodar" da "Sabah" kimi düzgün klubdu. Bizə qarşı həmişə səhv qərarlar olurdu. Cədvəl tərtib etmişdilər ki, "Krasnodar"a qarşı nə qədər hakim səhvləri olub. Rusiyada belə statistika aparılır. Həmişə belə olur ki, bir klub daha çox əziyyət çəkir hakimlikdən. Fikrimcə, bu mövsüm də oxşar vəziyyətə burda "Sabah" düşüb. Çox məmnun olaram onda ki, kənardan yalnız futbola baxaram və hakimlə yalnız oyun epizodlarıyla bağlı ünsiyyətə girərəm. Yəni, mənə aydın olmayan hansısa bir epizodu izah edirlər və davam edirik. Üç il avrokuboklarda çıxış etmişəm və orda kobud hakim səhvi olduğunu xatırlaya bilmirəm. Həqiqətən belədi. Rusiyada hakimlər səninlə danışırlar. Orda hər şey başqa cürdü. Azərbaycan hakimlərini ittiham eləmək istəmirəm. Çünki çox yaxşıları da var, həqiqətən var. Hansılar ki oyunu başa düşürlər. Gənclər də var ki, inanıram yaxşı hakim kimi böyüyəcəklər. Sadəcə, hər şey düzgün olmalıdı. "Sabah"a kömək etmək lazım deyil. Nə var, onu hakimlik edin. Bununla bütün Azərbaycan futbolu inkişaf edəcək.
"Sabah" klub ola bildi"
- Sizcə, "Sabah" klub ola bildi, yoxsa hələ ki yalnız komandadı?
- Fikrimcə, klub ola bildi, əlbəttə ki, belədi. İndi sizinlə danışdığımız stadionda baxın avrokuboklar üçün nə qədər işlər gedir ki, beynəlxalq standartlara cavab versin. Düşünürəm ki, yaxında klubun bazası olacaq. Hansında futbolçular yeyə, yata, gedib-gələ biləcəklər. Baza da irəliyə doğru böyük addım demək olacaq. Cari mövsümdəki nəticə də qeyd olunmalıdı. "Sabah"ın akademiyası yaxşı işləyir. Görürük ki, çoxlu turnin qalibi olurlar, Azərbaycanın aşağı yaş qruplarından ibarət yığmalarında çox təmsilçisi var. Ona görə dəqiq hesab edirəm ki, "Sabah" - klubdu. Ən əsası odur ki, klub rəhbərliyi bir yerdə dayanmır, daim yaxşı imkanlar olması yönündə işləyir.
- Yeniyetmələrlə işləməkdə zəngin təcrübəyə sahibsiniz. Bu yöndə "Sabah"ın sabahına töhvə verirsiniz, yoxsa ancaq " hər şey A komandası üçün" şüarını öndə tutursunuz?
- Akademiyada Xorvatiyadan koordinator var. Xorvatiya futbolunun səviyyəsinə bələdik, yaxşı biliyə malikdi. Təsadüfən bu postda qərarlaşmayıb. Keçən mövsüm gənclər komandasıyla yaxşı əlaqələrim vardı. Məşqçiləriylə görüşürdük, fikir mübadiləsi aparırdıq. Akademiyaya köməyim laızm olsa, bunu etməyə hazıram - hansısa seminar keçirərəm. Amma hələ ki daha çox ünsiyyətim gıəclər komandasıyla məhdudlaşır. Orda gənc baş məşqçimiz var, o, bizdə bir həftə təcrübədə olub. Bu, hər bir sahəyə aid idi. Təcrübəmizlə bölüşməyə hazırıq.
"İkinci dövrədə aşağıda gedən rəqiblərimizə qarşı münasibətimiz heç də düzgün deyildi"
- Bir halda ki, "Qarabağ"dan danışdıq, "Sabah"ın cari mövsüm ağdamlılarla matçlarda şəxsi oyunların balansında geri qalmadığını görürük. Bəs, mövsüm boyu çempiondan nədə geri qaldınız?
- Birinci oyun keyfiyyətinə söykənməliyik. Bunu etsək, müvafiq olaraq futbolçularımızın keyfiyyətini artıracağıq. Bununla da inkişaf edə bilərik. Cari mövsümdə gördük ki, oyun keyfiyyətində irəliyə addım atdıq. Son matçımız olan "Beşiktaş"la yoldaşlıq görüşü xarakteri daşısa da, gördük ki, müasir, aqressiv, sürətli futbol oynayırdıq. Bunu inkişaf etdirə bilsək və komandamızı gücləndirəcək bir neçə transferə imza atsaq, fikrimcə, daha çoxuna nail olarıq. Misal üçün bizə "Qarabağ"la mübarizə aparmaq çox maraqlıdı. Bu matçlar mənim üçün çox maraqlıdı. Çox güclü rəqibdi, ona qarşı yollar tapmalısan. Heç nə ehtimal etmək, yaxud söz vermək istəmirəm. Bilirəm ki, gördüyümüz işimizi davam etdirsək, inkişafımızı davam etdirə biləcəyik. Bu, bizi hansı yerə aparacaq - bilmirəm. Addım-addım getməliyik. Qarşıda Konfras Liqasında sınaq var, orda irəli getmək çox çətin olacaq. Heç kimdən qorxmuruq və çoxlu işləyəcəyik.
- İkinci eşelonla matçlarda çoxlu xal itirməyinizu indi soyuq başla analiz edəndə, hansı nəticə çıxarırsınız,
- Razıyam ki, "Qarabağ", "Neftçi", "Qəbələ" və "Zirə"ylə qarşılıqlı hücumlar şəraitində oynamaq bizə asandı. Belə futbolu sevirik. Digər beş komadaya gəlincə, prakatiki olaraq hamısı bizə qarşı 5 müdafiəçi ilə çıxış edir. Demək olar boş sahə yoxdu, sıx müdafiəyə qarşı oynamalı olursan. Rəqib isə əks-hücumlarda, standart vəziyyətlərdə oynayır, hər top uğrunda mübarizə aparır və "Sabah"a qarşı çox motivasiyalıdı. Ən yaxşı oyularını bizim komadaya qarşı keçirirlər. Biz də öz növbəmizdə uğurlu ilk dövrədən sonra - hansıda ki bir məğlubiyyət, bir heç-heçə vardı - psixoloji cəhətdən o köklənməylə çıxmırıq ikinci 5-likdəkilərə qarşı. Bizdə də o yoxdu ki, "Şamaxı"nı ustalıq səviyyəsinə görə üstələyək. Bunu edə bilmirik. Buna görə çox işləməli, pressinq etməli, topla çox səliqəli davranmalıyıq. Onda nəticə olacaq. Dediyiniz məqam mənim üçün daha çox psixoloji plandadı. Xüsusilə ikinci dövrədə aşağıda gedən rəqiblərimizə qarşı münasibətimiz heç düzgün deyildi. Bunun da acısını çəkdik. Amma son dövrədə "Kəpəz", "Turan Tovuz", "Şamaxı"yla matçlarda komandamızda artıq başqa münasibət gördük. Bu planda bir az yaxşılaşma var. Hətta "Şamaxı"yla ilk hissəni yaxşı, ikinci hissəni zəif keçirəndə belə, rəqibə qapımız qarşısında qol vəıziyyəıti yaratmağa imkan vermədik. Yəni, hər top uğrunda mübarizə aparırdıq, müdafiədə itizamlı oynayırdıq. Bu dəyişiklikləri gördüm. Yəqin, dediyiniz məqam qaçılmaz idi ki, hansısa eniş olacaq, bu və dəgər komandayla hansısa problemlərlə üzləşəcəyik. Bu, normaldı. Bilirəm nə etməliyik ki, səhvlərimiz təkrarlanmasın. Matçların xarakterləri tam fərqlidi. Böyük qüvvəylə müdafiə olunan komandanı açmaq çox çətindi. Dördüncü dövrədə pozitiv məqamları gördüm.
"Ona görə Yusifə mətbuata danışmağa qadağa qoyurdum..."
- Son 3 matça (Söhbət "Sumqayıt"la görüşdən əvvəl olub - C.Ə.) komandanı necə kökləyəcəksiniz?
- Heç nə dəyişmir. Çalıaşacağıq ki, maksimal nəticə əldə edək. Üstəlik, matçların hamısı bizim üçün prinsipialdı. Yaxşı rəqiblərdi. Bu mövsüm çox böyük işlər gördük. İndidən bunu bir kənara qoymayaq, gəlin, işimizi sonadək çatdıraq. İlboyu necə oynamışıq, bu 3 görüşdə də elə çıxış edək- bu, mənim üçün vacibdi. Futboçuların oyuna düzgün yanaşması olmalıdı.
- Belə çxıır ki, kimlərəsə indidən istirahət verməyəcəksiniz? Nəticə qazanandan sonra praktikada belə hal olur...
- Əlbəttə ki, yox. İstirahət etməyə 23 gün vaxtımız olacaq. Fikrimcə, bu, dincəlib, güc toplamaq üçün yetərincə müddətdi. Hamıya 29 maya bilet almışıq. Hamı da istirahətə mövsüm bitəndə gedəcək. Son matçımız "Neftçi"ylədi. Prinsipial rəqibdi, böyük klubdu. Hamıyla yaxşı oynamaq istəyirik.
- Əsas qapıçı etdiyiniz Yusif İmanov üzərində böyük zəhmətiniz var. Amma həm millidə, həm də "Beşiktaş"la matçda beynəlxalq təcrübəsizlik özünü göstərdi. Avrokuboklar öncəsi təcrübəli legioner qapıçı transferi aktuallaşıb?
- Fikrimcə, Yusifin 1 nömrə kimi oynaması bütün məşqçilər korpusunun əməyidi. Eləcə də akademiyanın, hansından çıxaraq ikinci komandada yer almışdı. Ona görə Yusifə mətbuata danışmağa qadağa qoyurdum - halbuki sorğular gəlirdi - komandanın hazırkı uğuru Yusifin, Mikelsin, yaxud Kaşukun uğuru deyil. Bu, bütün komandanın uğurudu. İstəyirəm Yusif ayıq başla bilsin ki, hansı mənfi cəhətləri var, hansı mübət. Əvvəl elədiklərini artıq indi etmək olmaz, çünki iş həcmini artırmaq, daha çox trenajor zalına məşqə getmək, ayaqla oynamağı daha da yaxşılaşdırmaq lazımdı. Göylərdə uçmamalı və deməməliyik ki, İmanov 2-ci yeri tutan komandanın əsas qapıçısıdı. O, yeni başlayır, inkişaf etməsi üçün daha çox işləməlidi. Buraxdığı səhvləri aradan qaldırmalı və nə tərifləri, nə də millidəki çıxışından sonra tənqdidləri eşitməlidi. Yusif istedadlı oğlandı, amma futbolçu həyatı onu hara gətirəcək, bunu görəcəyik. Qarşıda onun çox işi var. Yeni qapıçı axtarışına gəlincə, daha iki gənc yaxşı qapıçımız var - Nicat Mehbaalıyevlə Rustəm Samiqullin. Hazırda bu mövqeyə axtarışda deyilik. Amma onu da başa düşməliyik ki, 3 gənc qapıçınız varsa, birinin icarəyə getməsi mümkündü. Bu da oyun parktikası qazanmaq üçündü. Qapıçı məsələsi deyə bilərik açıqdı, amma bugünkü gündə Yusifə, daha yaxşı ola biləcəyinə inanırıq.
"Bilirəm ki, klub prezidentimiz Kaşukun transferinin baş tutması üçün hər şey edəcək"
- Aleksey Kaşuk səviyyəsini "Beşiktaş"la görüşdə də sübut etdi. Amma "Şaxtyor"a məxsusdu və transfer qiyməti də yəqin, günü-gündən artır. Necə olacaq - ən yaxşı halda yenidən icarəyə götürəcəksiniz?
- Kaşuku buraxmaya bimərik, çünki "Şaxtyor"a məxsusdu. Klub rəhərliyi qarşı tərəflə ünsiyyət qurur, danışıqlar gedir. Bilirəm ki, klub prezidentimiz Kaşukun transferinin baş tutması üçün hər şey edəcək. Amma obtektiv olaq ki, bunun reallaşması hədiz çətin olacaq. Kaşuk öz oyunuyla bir sıra təkliflər almasını haqq edib. Bilirəm ki, bura çox xoşuna gəlir və "Sabah"ın onun üçün etdikləri hər şeyi yüksək qiymətləndirir. Çünki heç vaxt belə uğurlu mövsümü olmamışdı, Ukrayna U-21 yığmasına qayıtdı. Hərçənd, dünya çempionudu, son matçlarda əsas heyət üzvü oldu, ümid edirəm ki, Avropa çempionatına yollanacaq. O da "Sabah"ı sevir və dəyər verir. Məncə, bu məsələ bir az uzanacaq. Xatırlayırsınız, onu "transfer pəncərəsi"nin son günündə qaytarmışdıq. Bu dəfə də məsələ belə uzanacaq. Hətta indi cavab verə bilmirəm. Alınsa, buna çox şad olarıq.
- Artıq müəyyənləşdirmisiniz kimlər qalacaq, kimlər "qara siyahı"nıza düşüb?
- Belə gurultulu səsləir. "Qara siyahı"ya boş-boş işlərlə məşğul olanlar, pis çalışanlar düşür. Sadəcə, mövqelər var ki, onları gücləndirmək istəyirik. Gənc futbolularımız var ki, az şans qazanırlar, onlara isə oynamaq lazımdı. Burda elə vəziyyətdi ki, transfersiz qalmaq olmaz. Çünki komandaya hər zaman yeni qan gəlməlidi, nəticədə futboçlu sayı artmalı, rəqabət yüksəlməlidi. Elə futbolçular var, praktiki rəqabətləri yoxdu, biz isə bunu yaratmalıyıq. Nəticədə hamı inkişaf etməlidi. "Qarabağ"a baxırıq ki, bir mövqedə iki bərabər səviyyəli futbolçuları var. Bizdə isə bütün mövqelərdə bu, yoxdu. Buna görə istərdik ki, 4-5 nəfər getsin, 4-5-i də gəlsin.
- Yəni, say baxımından dəyişiklik, artım olmasın...
- Növbəti mövsümdə say baxımından işimiz bir az asan olacaq. Çünki ikinci komandamız olacaq. Haızrda bu komandasız bizə çətindi. İqor Ponomaryovdan futbolçu götürməklə balanslaşdırırıq sayı. İkinci komandamız olanda isə kimisə ora göndərmək, ordan futbolçu götürə biləcəyik. Misal üçün Seymur orda oynaya, bizdə məqş edə biləcək.
"Ola bilər elə təklifim olsun ki, ondan imtina edə bilmərəm"
- Qarşıdan avrokubokda debüt gəlir. "Sabah"ın reytinqi yoxdu. Deməli, səpələnmişlərdən güclü rəqib düşəcək. Belə çıxır ki, ümid Murad Musayevin təcrübəsinə olacaq?
- Yox, əvvəl dediyim kimi, ümid işimizə və nizam-intizama olacaq. Bilirik ki, yalnız bu cür yanaşma hətta daha güclü rəqiblə dueldə uğura gətirə bilər. Buna görə özümüzdən nə asılıdırsa, etməli, yaxşı təlim-məşq toplanışı keçməli, yaxşı trasfer çalışmaları aparmalıyıq. Orda isə görəcəyik hara gətirib çıxaracaq. Heç kimdən qorxmayacağıq.
- Azərbaycanda belə nümimə var ki, səpələnməmiş olaraq qrupadək gedib çıxıb, özü də 2 dəfə. Bu, "Qəbələ" klubudu. Heç kim bunu gözləmirdi, amma belə alındı. Qarşınıza avromacərada hansısa vəzifə qoymusunuz?
- Bilirsiiz, qarşıma, 1, 2, 3 illik vəzifə qoymuram. Belə qabağa boylanmıram, bugünkü günlə yaşayıram. Bu gün işimi yaxşı görmək istəyirəm. Yəni, bu gün məşq varsa, mənim üçün çox vacibdi ki, onu düzgün qurum, keçirim, sonra isə videoda baxım ki, nə necədi. Bu, mənim üçün ən vacibdi. Heç nə ehtimal etmək istəmirəm. Çünki çox şey aydın deyil kİ, kim gələcək, kim gedəcək. Nə bacarıram, hər şey edəcəm uğurlu çıxış üçün. Bütün gücümü qoyacam, nəyə gətirib çıxaracağını artıq zamanıda görəcəyik.
- Müqavilənizi sonunadək işləyib sonra gedirsiniz, yoxsa Bakı sizi də özünə bağlayıb vıə "Sabah"da işinizi qeyri-müəyyən müddətə qədət davam etdirəcəksiniz?
- Birincisi, o deyim ki, Bakı çox xoşuma gəlir. Bunu işlədiyim futbolçulara, klub rəhbərliynə, işçilərə də aid edə bilərəm. Burda çox yaxşı insanlarla tanış oldum. Qazandığımız uğur futbolçular, rəhbərlik mənə inanmasaydı, mümkün olmazdı. Rəhbərlik çox şey edir bunun üçün. Bu, elə bir işdi ki, görünmür. Bir gün belə olmayıb ki, Azərbaycana getdiyimə görə heyfsilənim. Burda hər şey xoşuma gəlir, ailəmə rahatdı. Amma sözləri havaya atmaq istəmirəm. Hazırlıq, transfer planları hazırdı, işləyirik, "Sabah"la irəliyə doğru gedirik. Sonra necə olacaq, bilmirəm. Ola bilər elə təklifim olsun ki, ondan imtina edə bilmərəm. Sizə söz verə bilmərəm, amma indi bütün fikirlərim yalnız "Sabah"ladı. Müqaviləmin müddəti vacib deyil. Yənİ, klub mənə istənilən müqaviləni, istənilən müddətə təklif edə bilər. Mənə müddətin 1-2 il olması komfortludu və hər zaman razılaşa bilərik. Bu məsələdə mənim üçün hər şey sadədi və aydındı. İndi burdayam, bütün gücümü qoyuram və "Sabah"dan başqa heç nə haqda düşünmürəm. Amma nə qədər burda olacam, bilmirəm. Ola bilər ki, növbəti mövsüm uğursuz olacaq, klub rəhbərliyi deyəcək "sağ ol, gəl, yollayırımızı ayıraq". Buna görə qabağa boylanmaq istəmirəm. Sadəcə, işimi maksimal görüm, sonra baxarıq. Bugünkü gündə mənim üçün hər şey yaxşıdı və xoşbəxtəm. Fikrimcə, bu əhval-ruhiyyədə işimizi davam etdiririk.
CEYHUN ƏLİYEV
