"Sabah"ın baş məşqçisi Murad Musayev Rusiyanın "Match TV" kanalına müsahibə verib. Sport24.az xəbər verir ki, rusiyalı mütəxəssis Azərbaycan Premyer Liqasında VAR sisteminin tətbiq olunacağı haqda danışaraq, buna münasibətini söyləyib: "Rusiya VAR sistemindən çıxanda rahat nəfəs aldım (gülür). Təkrarlar 4-5 dəqiqə çəkir, bu kimə lazımdır? Bu sistemdə hakimlikdən iki dəfə çox danışılır, çünki epizodları istədikləri kimi yozurlar. Azərbaycanda yarım ildir VAR-sız gözəl yaxşı, futbol var idi ki, buna sevinirdim. Sonra bizi yığıb dedilər ki, bu sistemi tətbiq edirlər. Ddim ki, VAR Rusiyadakı kimi olacaqsa, bunun əleyhinəyəm. Ondansa VAR-sız oynamaq daha yaxşıdır. Sonra iki yoxlama oyunu keçirdilər. Hər şeyi tez və dəqiq yoxladılar. Dedim ki, hər şey belə olacaqsa, mən də VAR-ın olmağını istəyərəm. VAR futbol üçün yaxşıdır. O, oyunu daha yaxşı edir. Amma bu sitemdən düzgün istifadə etmək lazımdı".
39 yaşlı Musayev hakimlərimizlə bağlı suala "təxminən Rusiyadakı kimidi" cavabını verib: "Keçən mövsüm vərəqələrim çox idi, son oyunu buraxdım. Kubokda da bir oyunda qovulmuşdum. Narazı olduğum məqamlar var. Emosional məşqçiyəm, əleyhimizə olan kobud səhvlərə reaksiya verirəm. Düşünürəm ki, çempionatın sonunda hakimlər bizi pis mühakimə etdilər. Meydanda yaxşı hadisələr baş vermədiyinə görə emosiyalarıma hakim ola bilmirəm".
