"Araz-Naxçıvan"ın son qələbələrində hələ I Diviziondan heyətində çıxış edərək bombardiri olmuş futbolçusu Orxan Əliyevin böyük rolu var. Belə ki, artıq hesabına 3 qol yazaraq cari çempionatda da komandanın ən sərrast oyunçusu olan 28 yaşlı hücumçu "Neftçi"ylə "Dalğa Arena"dakı matçda penaltini qola çevirməklə qələbənin əsas memarı oldu. Orxan görüşdən sonra Sport24.az-ın əməkdaşının suallarını cavablandırıb.
- “Araz-Naxçıvan”ın “Neftçi” üzərində çoxlarının gözləmədiyi qələbəni necə şərh edərdin?
- Qalib gəlsək də, oyun çox çətin keçdi. Bilirdik ki, “Neftçi” güclü komandadı. Şükürlər olsun ki, istəyimizə çatdıq. Özüm də qol vurduğum üçün sevinirəm.
- Ötən mövsüm I Divizionda bombardir olan Orxan Əliyev indi də eyni uğuru Premyer Liqada hədəfləyir?
- Divizion başqa səviyyədi, Premyer Liqa başqa. Əlbəttə, istərdim ki, Premyer Liqada da bombardir olum. Bunun üçün əlimdən gələni edəcəm. Çalışıram ki, daha çox qol vurmaqla komandamın qələbəsində pay sahibi olum.
- Komandanızın arxada qalan 6 turda çıxışına necə qiymət vermək olar?
- Nəticələrimiz normaldı. Yeni komandayıq. Özünüz görürsüz ki, necə oyun göstəririk. Motivasiya baxımından da komandada hər şey qaydasındadı.
- “Araz-Naxçıvan” kimi, bu mövsüm özün də müəyyən fasilədən sonra Premyer Liqada qayıtdın. Necə hiss edirsən yüksək liqada özünü?
- Bilirdim ki, qayıdacam. Özü də daha güclü şəkildə. Müəyyən səbəblər var idi. Bəziləri deyirdi ki, “o, daha qayıtmayacaq”. Lakin hər şey göz qabağındadı.
- Belə başa düşdüm ki, kimlərləsə xüsusi prinsipin var...
- Prinsip yoxdu. Sadəcə, mənə ləzzət edir ki, “Orxan daha yoxdu” deyənlər indi kənardan vurduğum qolları izləyirlər.
- Növbəti turda “Səbail”lə səfər matçından gözləntilərin nədi?
- “Səbail” də yaxşı komandadı. Son turlar qələbələri sıralayır. Biz isə öz növbəmizdə matça yaxşı köklənib, 3 xal üçün əlimizdən gələni edəcəyik.
MEHMAN SÜLEYMANOV
