Bakının özəl gözəlliyi Xəzərdi. Payızda, qışda paytaxtımıza "Küləklər şəhəri" libası geyindirən, yazda dənizkənarı bulvarda sevgililərin parıldayan gözlərinə xüsusi füsünkarlıq gətirən, yayda isə çimərlikləri ilə özünü sevdirən Xəzər. Mən indi, fevral ayında dənizə getmək istəyirəm. İstəyirəm ki, dalğalar öz ənənəvi işini görsün, mən susum, dəniz isə məni dinləsin... fevral ayında.
Yox, mən dəli olmamışam, amma futbolumuzun dəli olmamasını çox arzulayıram. Görünən və görünməyən problemləri indi açmalıyam ki, yayda başımıza cüt yumruq vurmayaq. Mən buna klublarımızı səsləyirəm. Səsləyirəm ki, indi, məhz indi dənizə, Xəzərə girsinlər, dalğalar onlara sığal çəksin, onlar sussun, dəniz isə onları dinləsin... fevral ayında.
Yayda dənizə hamı girir, kiçik də, böyük də, güclü də, zəif də, kök də, arıq da. Bəzən dəniz insanları udur, bir müddət sonra isə geri qaytarır. Torpağın üzü soyuqdu, atam balası. Ölünü dəfn etdikdən bir müddət sonra göz yaşları quruyur, dünyasını dəyişən isə ancaq xatirələrdə yaşayır. Üzə bilmirsinizsə, dənizin dərinliyinə getməyin: həyat şirindi, bunu heç vaxt unutmayın - nə fevral ayında, nə də yayın istisində.
Yayda 4 təmsilçimiz "Avrokubok dənizi"nə baş vuracaq. Bu sıralamada hansı kvartetin yer alacağı hələ ki məlum deyil. Ən azından 4-cü komandanın kimliyi bilinmir. "Zirə" və "Qəbələ" ayağını suya batıran və üşüdüyünə görə dərhal geri çəkilən körpəni xatırladır. Hələlik ürək edib "dənizə mən daxil olacam" deyə bilmirlər. Ancaq istəsələr də, istəməsələr də bu səddi aşacaqlar. Əlbəttə ki, 2 iddiaçıdan yalnız birinə "dənizə bilet" təqdim olunacaq. Və bundan sonra "4 muşketyor" "Avrokubok dənizində səyahətə start verəcək... iyulda.
"Qarabağ"a dair nəsə yazmağa ehtiyac yoxdu. Qurban Qurbanov futbolumuza elə möhür vurub ki, yanlışa yol versə də "canın sağ olsun" - milli frazeologizmi eşidəcək. Bu statusa "Sabah"ı da layiq görmək lazımdı. Mən iddia etmirəm ki, "bayquşlar" dənizə daxil olar-olmaz "batacaqlar". Əsla! "Sabah" hazırda əla futbol sərgiləyir və Konfrans Liqasının qrupunadək irəliləmək potensialına sahibdi. Sadəcə, klub 23-24 mövsümündə tarixində ilk dəfə yeni dənizə daxil olacaq. Həyacanı boğa bilsələr, nə xoş bizə. Ancaq elə ilk addımdaca "batsalar" da qınaq obyektinə çevrilməməlidirlər. Debütant statusu buna imkan verir. Bunu indidən deyirik... iyul ayı üçün.
Bəs digər 2 komanda? Qalan 2 yerə 3 namizəd olsa da, "Neftçi"nin vəsiqəni əldən verməsi real görünmür. "Ağ-qaralar" indiki futbolla nəinki dənizdə, hətta səhrada da batarlar. Əminəm ki, klub rəhbərliyi, məşqçilər heyəti və ən əsası sponsor da bunun fərqindədir. Yayda 1 mərhələ adlayıb büdrəsə, "Neftçi" günahı bəxtsizlildə, yadplanetlilərdə axtarmaq kart-blanşına sahib olmayacaq. Çünki gözlənilən fiasko indidən görünür... fevraldan.
Nəhayət, dənizin son sakini barədə. Burda biz yetərincə avrokubok təcrübəsi olan 2 komandadan danışacağıq - "Zirə" və "Qəbələ". Bu komandaların qarşısına "Avrokubok dənizində istirahət" məqsədi qoyula bilməz e, bil-məz! Qitəmiqyaslı turnirə qatılırsansa, ən azı 1 mərhələ adlamalısan! "Dənizdə "akula"ya rast gəldik", "büdcəmiz aşağıdı", "onların futbol ənənəsi var", "gələcək üçün təcrübə topladıq" tipli açıqlamalarla bəraət qazana bilməzsiniz. Çünki bu yarışda özünü yox, ölkəni təmsil edirsən. Deməli, əlini məsuliyyətin altına qoyursansa, yükə də cavab verməlisən. Yox, Avropa miqyaslı turnirlərə gəzinti gözü ilə baxılacaqsa, heç ora düşmək üçün can atmağa, mübarizə aparmağa dəyməz. Bir halda ki, əlin ətəyindən uzun geri dönəcəksən, pul xərcləyib "o dənizə" girməyin adı yoxdu. Azı bir burulğana sinə gərmək üçün vəsait azdırsa, bunu indidən bildirmək lazımdır - həm mətbuata, həm də klub rəhbərliyinə. Biz bütün bunları indidən - fevraldan deyirik...
Ki, iyulda Azərbaycanı bəhanələr toplusu ilə qarşılamayasınız, qələbə müjdəsi ilə sevindirəsiniz - "Neftçi", "Zirə" və "Qəbələ".
QƏDİR BİLMƏZ
