Azərbaycan Voleybol Federasiyasının (AVF) rəhbərliyi qadın voleybolçulardan ibarət yığmamızın üzvləri ilə görüşüb. Sport24.az xəbər verir ki, görüşdə AVF-in prezidenti Şahin Bağırov, vitse-prezident və millimizin baş məşqçisi Faiq Qarayev, vitse-prezident Bəhruz Quliyev, baş katib Faiq Orucov və komandanın meneceri Səbinə Babayeva iştirak ediblər. Hazırda ölkə xaricində olan voleybolçularımız isə görüşə onlayn formatda qoşulublar.
Tədbirdə çıxış edən Bağırov ilk olaraq bir müddət əvvəl başa çatmış Qızıl Avropa Liqası haqqında danışıb. O, komandamızın bu il yarışda istənilən kimi çıxış edə bilməməsini təəssüflə qeyd edib. Bildirib ki, bir neçə aparıcı oyunçumuz müəyyən səbəblərdən milliyə kömək edə bilmədi, bu da nəticəmizin zəif olmasına gətirib çıxardı. Bununla belə, AVF rəhbəri bu ilin noyabrında İslam Həmrəyliyi Oyunlarının, gələn ilin avqustunda isə Bakıda Avropa çempionatının qrup mərhələsinin təşkil olunacağını bildirib və bundan sonra məhz həmin oyunlara köklənməyin vacibliyini diqqətə çatdırıb. Ş.Bağırov onu da qeyd edib ki, bu gün ölkəmizdə uşaq voleybolunun inkişafı ilə bağlı mühüm işlər görülür, istedadlı voleybolçular hazırlanır. O, bu voleybolçuların gələcək illərdə milli komandaya cəlb olunaraq mötəbər yarışlarda uğurla çıxış edəcəklərinə inamını ifadə edib. Federasiya prezidenti millimizin üzvlərinə uğurlar arzulayıb və zədəsiz mövsüm keçirməyi diləyib.
Faiq Qarayev bildirib ki, artıq klublar mövsümü başlayır və voleybolçular öz komandaları ilə növbəti mövsümə hazırlaşırlar. Buna baxmayaraq, İslam Həmrəyliyi Oyunlarına hazırlıq prosesinin də təşkil olunacağını vurğulayıb. O, həmçinin gələn il ölkəmizdə təşkil olunacaq Avropa çempionatının qrup mərhələsində iştirakla bağlı da müzakirələr aparılacağını əlavə edib. F.Qarayev yaxın aylarda qitə birinciliyinin qrup mərhələsinin püşkatma mərasiminin keçiriləcəyini və bundan sonra yarışa hazırlıq planının tərtib olunacağını deyib.
Daha sonra millimizin üzvləri də çıxış ediblər və qarşıdakı yarışlara hazırlıqla bağlı fikirlərini bölüşüblər.
