UEFA 21 yaşadək futbolçulardan ibarət yığma komandalar (U-21) arasında 2025-ci il Avropa çempionatının seçmə mərhələsinin sentyabrda başlamasını üstün tutub. Bu haqda Sport24.az-a İsveçrədə bu gün keçirilən püşkatma mərasimində iştirak etmiş U-21 yığmamızın baş məşqçisi Samir Əliyev məlumat verib.
Onun sözlərinə görə, qitə futbol qurumu növbəti seçmə mərhələnin iyunda başlamasını arzuolunmaz sayıb: "UEFA-nın belə bir tövsiyəsi oldu ki, U-21-in seçmə mərhələ oyunları sentyabrda başlansın. Çünki bu ilin iyununda Avropa çempionatının final mərhələsi var. Buna görə bir çox ölkələr var ki, sırf ora hazırlaşırlar. Bizim qrupda da belə yığmalar var. O üzdən yeni seçmə mərhələnin sentyabrda start götürməsini daha məqsədəuyğun saydılar. Həm də ona görə ki, U-21-də yeni nəsil gəlir, nəsildəyişmə gedir. Ona görə özləri də istəyirlər ki, sentyabrdakı UEFA-nın "pəncərə"lərindən istifadə edərək, yoxlama matçları keçirməklə U-21-nin yeni heyətini formalaşdırsınlar. Növbəti tsikldə 2002-ci il təvəllüdlülərdən başlayaraq futbolçular çıxış edəcək".
Qeyd edək ki, yığmamızın AVRO-2025-də rəqiblərindən İngiltərə və Ukrayna final mərhələsində çıxış edəcək. Həmim mərhələnin matçları iyunun 28-dən iyulun 8-dək 2 ölkədə - Rumıniyada və Gürcüstanda keçiriləcək.
MEHMAN SÜLEYMANOV
